प्रायः विदेशी प्रतियोगितामा व्यस्त रहने अल्ट्रा धाविका मीरा राई, यतिबेला झापामा छिन् । खुट्टामा लागेको चोटका कारण उनले पछिल्लो एक वर्षयता कुनै प्रतियोगितामा सहभागिता भने जनाउन पाएकी छैनन् । तर, पनि उनको विदेश आवतजावतको यात्रा भने जारी थियो । खुट्टाको शल्यक्रियापछि खेलमा फर्किने तयारीमा रहेकी मीराले अझै केही समय पर्खिनुगर्ने भएको छ ।
विश्वभर फैलिएको कोरोना भाइरसका कारण विश्व खेलजगत शून्य अवस्थामा रहेपछि मीरा निराश बनेकी छन् । एक वर्षभन्दा लामो समय प्रतियोगिताबाट बाहिर रहेकी मीरा वर्ष २०२० बाट खेलमा फर्किने सोचमा थिइन् । उनले इटालीको १२० किलोमिटर लामो लभारेडो अल्ट्रा रेसबाट पुनः खेलमा फर्किने योजना बनाएको सुनाइन् । तर, उनको यो पर्खाइ केही समय लम्बिने भएको छ ।
