टिपरको ठक्करबाट सुर्खेतमा एक जनाको मृत्यु भएको छ। मृत्यु हुनेमा कालिकोटको महावै गाउँपालिका–३ डिल्लीकोटका  केशर सिंह रहेका छन्। 

मंगलबार बिहान वीरेन्द्रनगरको मुख्य सडकमा गौतम चोक नजिकै पश्चिम दिशाबाट पूर्वतर्फ आइरहेको भे १ ख २२४२ नम्बरको टिपरले सोही दिशाबाट पूर्वतर्फ आइरहेको भे १ प २१७८ नम्बरको मोटरसाइकललाई ठक्कर दिँदा चालक सिंहको मृत्यु भएको हो।

दुर्घटनापछि वीरेन्द्रनगर तनावग्रस्त बनेको छ। मुख्य सडकको गौतम चोक, यरीचोक र मंगलगढी चोकमा मृतकका आफन्तले टायर बालेर प्रदर्शन गरिरहेका छन्।

आफन्तले टिपर र चालकलाई आफ्नो रोहबरमा नल्याएसम्म लास नबुझ्ने भन्दै सडक बन्द गराएका छन्। प्रहरीले टिपर चालक र टिपरलाई नियन्त्रणमा लिएको छ।