अन्नपूर्ण आधार शिविर (बेसक्याम्प) पदमार्गमा हिमपहिरो गएपछि दुई नेपाली सम्पर्कविहीन भएका छन्।

अन्नपूर्ण ११ का वडाध्यक्ष भीम गुरुङ अनुसार पदयात्रामा गएका चिनियाँ पर्यटकका गाइड र कोरियन पर्यटकका पोर्टर सम्पर्कविहीन भएका हुन्। उनका अनुसार हिमपहिरोमा फँसेका एक जना कोरियन पर्यटकको उद्धार गरेर सुरक्षित स्थानमा ल्याइएको छ।

९ जनाको समूहमा रहेका कोरियन एकअर्कासँग छुट्टिएको अन्नपूर्ण संरक्षण क्षेत्र आयोजना एक्याप इलाका संरक्षण कार्यालय घान्द्रुकका प्रमुख विदुर कुँइकेलले जानकारी दिए। उनका अनुसार बेसक्याम्प पदमार्गको देउराली र हिमालयबीच रहेको हिमपहिरोले बनाएको खोल्सामा उनीहरू हराएका छन्। 

बिहीबारदेखि परेको हिमपातका कारण सो पदमार्गमा अहिले हिमपातका कारण पदमार्गमा रहेका लघुजलविद्युत आयोजना बन्द भएको र विजुली नहुँदा फोन र इन्टरनेटको टावर डाउन भएको छ। साेही कारणले सम्पर्कका कुनै माध्यम चल्न नसकेकाे  प्रमुख कुँइकेलले बताए।