वीरगञ्जबाट सशस्त्र प्रहरीले अवैध भारतीय रुपैयाँ सहित एकजना भारतीय नागरिक पक्राउ गरेको छ। भारतको पूर्वी चम्पारण थाना कोटवा ६ बस्ने राजेन्द्र प्रसाद मशरखको छोरा २९ बर्षिय सचिन भाष्कर पक्राउ गरेको हो।
उनको साथबाट ५ लाख १७ हजार ४ सय भारतीय रुपैयाँ बरामद भएको प्रहरीले जनाएको छ। झोला भित्र भारु लुकाएर ल्याउँदै गर्दा वीरगञ्ज महानगरपालिका वडा नं १६ रजतजयन्ती चोकबाट भाष्करलाई नियन्त्रणमा लिएको सशस्त्र प्रहरीले जनाएको छ।
उनको साथबाट भारु ५ सय दरका १००४ थान, २ सय दरका ५३ र १ सय दरका ४८ थान फेला परेको छ। उनलाई आवश्यक अनुसन्धान तथा कारबाहीका लागि राजश्व अनुसन्धान कार्यालय पथलैया बारामा बुझाइएको सशस्त्र प्रहरी नायब उपरीक्षक अमर खत्रीले जानकारी दिए।
