राजधानीको चावहिल क्षेत्र बिहानैदेखि तनावग्रस्त बनेको छ। पशुपति बहुमुखी क्याम्पसमा अध्ययन गर्ने सृष्टि पन्तलाई गाडीले  ठक्कर दिएर गम्भीर घाइते बनाएपछि त्यसको विरोधमा विद्यार्थीहरुले चावहिल क्षेत्रमा यातायात अवरुद्ध गरेका थिए ।

बा ७ ख ५९३० नम्बरको बसले पन्तलाई सोमबार बिहान सुकेधारामा ठक्कर दिएको थियो। ठक्कर दिएर गाडी भागेपछि विद्यार्थीहरुले अन्य गाडीमा तोडफोड र आगजनी गरेका थिए।

गाडीको ठक्करबाट गम्भीर घाइते पन्तको अहिले उपचार भइरहेको छ ।

पन्त बीबीएस चौथो वर्षमा अध्ययनरत विद्यार्थी हुन्।

प्रहरीका अनुसार विद्यार्थीले एउटा गाडीमा आगजनी गरेका छन् भने अर्को गाडीमा तोडफोड गरेका छन्।

विद्यार्थीलाई ठक्कर दिने गाडी र चालकलाई भने प्रहरीले नियन्त्रणमा लिएको छ ।

विद्यार्थीहरुले बा ४ ख ७१०१ नम्बरको बसमा आगजनी गरेका थिए भने बा ३ ख ४४३३ नम्बरको बसका सिसा तोडफोड गरेका थिए।

अहिले पनि अवस्था भने तनावग्रस्त छ । प्रहरीले पशुपति क्याम्पस वरपर ठूलो संख्यामा प्रहरी परिचालन गरेको छ।

प्रहरी र विद्यार्थीबीच केहीबेर झडप समेत भएको थियो। झडपका क्रममा केही विद्यार्थी घाइतेसमेत भएका छन्।