घरेलु टोली भारतले अष्ट्रेलियाविरुद्धको दोस्रो एकदिवसीय क्रिकेटमा जित निकालेको छ । मंगलबार भएको खेलमा भारतले अष्ट्रेलियालाई ८ रनले हराएको हो ।

नागपुरमा भारतले दिएको २५१ रनको लक्ष्य पछ्याएको अष्ट्रेलिया ४९ ओभर ३ बलमा अलआउट हुँदै २४२ रनमा समेटियो ।

अष्ट्रेलियाका मार्कस स्टोइनेसले ५२ रनको अर्धशतकीय इनिङ्स खेलेपनि टोलीलाई जित दिलाउन सकेनन् । यस्तै उसका पिटर ह्याण्ड्स्कम्बले ४८, उस्मान ख्वाजाले ३८ कप्तान एरोन फिन्चले ३७ रन बनाए  ।

अष्ट्रेलियालाई सस्तैमा समेट्न भारतका कुलदीप यादवले ३ तथा जस्प्रित बुम्रा र बिजय शंकरले समान २/२ विकेट लिए ।

यसअघि टस हारेर पहिले ब्याटिङ गरेको भारतले ४८ ओभर २ बलमा अलआउट हुँदै २५० रन बनाएको थियो  । भारतको लागि कप्तान विराट कोहलीले ११६ रनको शतकीय इनिङ्स खेले । यस्तै विजय शंकरले ४६ रन बनाए । 

अष्ट्रेलियाका पाट कुमिन्सले ४ तथा आडम जाम्पाले २ विकेट लिए ।

जितसंगै भारतले पाँच खेलको सिरिजमा २-० को अग्रता बनाएको छ । घरेलु टोलीसंगको टी-ट्वान्टी सिरिज भने अष्ट्रेलियाले जितिसकेको छ ।