फिनल्याण्डमा ३४ वर्षकी सन्ना मारिन प्रधानमन्त्री भएपछि नेपालमा पनि उनको चर्चा सेलाएको छैन।
यही बेला लोकतान्त्रिक राजनीतिक दल नेपाली कांग्रेसको विद्यार्थी संगठन नेविसंघमा ५० वर्ष नाघेका व्यक्तिलाई नेतृत्वमा ल्याउने चलखेल भइराखेको छ।
यस्तो चलखेल हुनुलाई पश्चगामी, अविवेकी र मुर्खतापूर्ण सोच हो भन्ने म अनुमान गर्न सक्छु। राजनीतिमा उमेरभन्दा पनि उत्साहले अर्थ राख्छ भन्ने छ तर दल निर्णय र नैतिकतामा पनि अडिग हुनुपर्छ।
नैतिक प्रश्नले लोकतान्त्रिक र आदर्श राजनीतिलाई टिकाएको हुन्छ। स्वतन्त्रताका निम्ति भएका संसारमा ठूला ठूला आन्दोलन र अभियान नैतिकबलमा नै सफल भएका छन्।
अन्धकारयुगको समाप्तिमा पुनर्जागरण अभियान जसरी युरोपमा ब्यापक बन्यो त्यसरी नै नेपालमा पनि राणाशासनको वर्वर युगको समाप्तिका निम्ति लोकतान्त्रिक उषाकालका लागि त्योभन्दा कम महत्वको संघर्ष भएन।
भारतमा गान्धीको अहिंसात्मक आन्दोलनसंगै नेपालमा भएको सशस्त्र संघर्ष दुबैको अधारभूमि नैतिकबल नै थियो।
