त्यस्ता विवाह भोजहरुलाई पनि माथ दिने गरी हरेक वर्ष संविधान दिवसको साइत पारेर मुलुकमा एउटा महाभोज चल्छ– पदक–सम्मान वितरणको । पदक–सम्मान वितरणको लागि नाम ठेगिएका व्यक्तिहरुलाई किन त्यो दिइयो वा दिइन्छ भन्ने कुरामा खासै न्यायोचित आधार वा मापदण्डहरु पूरा गरिएका हुँदैनन् । उनीहरुलाई फगत यसकारण पदक–सम्मान वितरणको त्यस्ता भतेरमा सामेल गराइएका हुन्छन् कि त्यो महाभोज आयोजना गर्न राज्यले खटाएका व्यक्तिहरु वा सत्ताका वरिपरि घुम्ने वर्गहरुसँग तिनको ‘गोरुको दाम्लोसम्म बेचेको’ साइनो हुने गर्छ । पदक पाउने व्यक्तिले के कति कारणले पदक–सम्मान पाए वा के कति योगदानका कारण उनीहरु त्यसका लागि हकदार भए भन्ने कुरा राज्यले आफूलाई कर तिर्ने जनतालाई पारदर्शी ढंगले बताइबस्नु जरुरी नै ठान्दैन । अरु त अरु सम्भवतः पदक पाउने व्यक्तिहरुलाई आफूले के कति कारणले पदक दिइयो भन्ने कुरा  पनि राम्ररी थाहा हुँदैन होला ।