रौतहट– रौतहटको चन्द्रपुर नगरपालिका १ स्थित मंगलपुर जंगलमा रोकिराखेको यात्रुबाहक बसलाई मालबाहक ट्रकले पछाडिबाट सोमबार राति ठक्कर दिँदा २ जना भारतीय नागरिकको मृत्यु भएको छ। दुर्घटनामा २१ जना घाइते भएको प्रहरीले जनाएको छ। ३ जनाको अवस्था गम्भीर छ।
काठमाडौंबाट जनकपुरतर्फ गईरहेको ना.६ ख. ९०३० भारतीय तिर्थयात्री सवार बस सोमबार राति १२.४५ बजेको समयमा पूर्व पश्चिम राजमागको पौराई जंगलस्थित मंगलपुरमा यात्रुको शौचका लागि रोकेको अवस्थामा सोही दिशातर्फ गइरहेका को. १ ख २६२५ नम्वरको मालबाहक ट्रकले पछाडिबाट ठक्कर दिँदा २ भारतीयको घटनास्थलमै मृत्यु भएको प्रहरीले जनाएको छ।
उक्त बसमा भारतको उडिसा राज्यका ६० जना तीर्थयात्री सवार थिए। ट्रकले ठक्कर दिँदा उडिसा राज्यको उपरा साही नयरखण्डाला मन्दीर जागामारा भुवनेश्वर खोडदाहाका ५२ वर्षीय विजयकुमार जेना र ५४ वर्षीय चरण विशालको घटनास्थलमै ज्यान गएको रौतहटका डिएसपी नविन कार्कीले जानकारी दिए।
