प्रतिनिधि सभाको आज दिउँसो १ बजेका लागि बोलाइएको बैठक अझै बस्न सकेको छैन। भिजिट भिसा प्रकरणमा जोडिएका गृहमन्त्री रमेश लेखकमाथि छानबिन र राजीनामाको माग गर्दै विपक्षीले सदन अवरोध जारी राखेपछि बैठक बस्न ढिलाइ भएको हो। प्रतिपक्षी आफ्नो अडानबाट ब्याक नभएपछि सभामुखले दलका प्रमुख सचेतक/ सचेतकहरूसँग संसदको अवरोध हटाउने वियषमा छलफल थालेका छन्।
बिएल संवाददाता - काठमाडौं
राजसंस्था र हिन्दु अधिराज्यको माग गर्दै आन्दोलन गरिरहेको राजावादीहरूको संयुक्त जनआन्दोलन समितिको बैठक बस्दैछ। बुधबार नवदुर्गा पार्टी प्यालेस, सुकेधारामा दिउँसो २ बजेका लागि बैठक बोलाइएको हो। बैठकमा संयुक्त जनआन्दोलन समितिमा आवद्ध ४४ राजनीतिक दल, समूह, अभियानका प्रतिनिधिहरू सहभागी हुने बताइएको छ। संयुक्त जनआन्दोलन समितिले जेठ १५ गतेबाट पहिलो चरणको एक हप्ता लामो राजसंस्था र सनातन हिन्दु अधिराज्यको माग गर्दै आन्दोलन गरेको थियो।
बिएल संवाददाता - काठमाडौं
प्रधानमन्त्री केपी शर्मा ओलीले जातीय छुवाछूत उन्मूलन दिवसको शुभकामना दिंदै मानवता भन्दामाथि कुनै जात नहुने बताएका छन्। बुधबार छुवाछूत उन्मूलन दिवसको अवसरमा सामाजिक सञ्जालमार्फत उनले आमाले जात नजन्माउने मानव जन्माउने बताएका हुन्। उनले लेखेका छन्, ‘आमाले जात जन्माउँदिनन्, नवजात मानव जन्माउँछिन्। नवजात शिशु हिँड्न थालेपछि समाजले जात र थर सोध्न थाल्यो।’
बिएल संवाददाता - काठमाडौं
गृहमन्त्री रमेश लेखकले राजीनामा नदिने बताएका छन्। बुधबार प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा बोल्दै उनले आफूले राजीनामा नदिने दोहोर्याएका हुन्। सांसदहरूले भिजिट भिसा प्रकरणबारे गृहमन्त्री लेखकसँग प्रश्न गरेपछि उनले जवाफ दिए, ‘संसदमै बसेर जवाफ दिनेछु। तर राजीनामा दिन्नँ।’
बिएल संवाददाता - काठमाडाैं
नेपाल कम्युनिष्ट पार्टी (एकीकृत समाजवादी)का अध्यक्ष माधवकुमार नेपालले जातीय छुवाछूत अन्त्यका लागि आ–आफ्नो ठाउँबाट योगदान गर्न सबैलाई आह्वान गरेका छन्।
बिएल संवाददाता - काठमाडौँ
राष्ट्रपति रामचन्द्र पौडेलले जातीय छुवाछूत तथा विभेदविरुद्ध दृढतापूर्वक उभिनुपर्ने बताएका छन्। जातीय भेदभाव तथा छुवाछूत उन्मूलन राष्ट्रिय दिवसका अवसरमा आज शुभकामना सन्देश जारी गर्दै उनले उक्त कुरा बताएका हुन् यस अवसरमा स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, शान्ति र समृद्धिको कामना गर्दै राष्ट्रपतिले जातीय विभेद सामाजिक, नैतिक तथा मानवीय गरिमा विरुद्धको अपराध हो भनेका छन्।
बिएल संवाददाता - काठमाडौँ
सङ्घीय संसद्को दुवै सदनको बैठक आज बस्दै छ। प्रतिनिधिसभाको बैठक आज अपराह्न १ः०० बजे बस्दै छ। आजको बैठकमा उपप्रधान तथा अर्थमन्त्री विष्णुप्रसाद पौडेलले वक्तव्यसहित ‘ आर्थिक वर्ष २०८२-८३ को राजश्व र व्ययको वार्षिक अनुमानमाथि सामान्य छलफल गरियोस्’ भन्ने प्रस्ताव पेस गर्नुहुने र प्रस्तावमाथि छलफल हुने कार्यसूची छ।
बिएल संवाददाता - काठमाडौँ
नेपाली कांग्रेसका महामन्त्री गगन थापाले नेपालगन्ज पुगेर कांग्रेसमा आर्थिक उदारीकरणका विषयमा छलफल र वहस नै हुन छाडेको बताएका छन्। ‘मेरो मुद्दा न कसैले पढ्यो न बुझ्यो, न छलफल नै भयो। मलाई महामन्त्रीमा यसै भोट दिए’ -महामन्त्री थापाले मंगलबार स्थानीय उद्योगी व्यवसायीको छलफलमा यस्तो धारणा राखे। महामन्त्री थापाले पछिल्लो महाधिवेनमा आफूले उठाएका आर्थिक मुद्दामा ‘न कसैले छलफल गरे न त प्रश्न नै सोधे तर भोट दिएर जिताए’ भन्दै आफ्नो आश्चर्यता प्रकट गरे।
बिएल संवाददाता - काठमाडौं
नेकपा (माओवादी केन्द्र)का अध्यक्ष पुष्पकमल दाहालले बिचौलियाहरूले संख्याको बलमा षडयन्त्रपूर्ण तरिकाले माओवादीलाई सरकारबाट बाहिर ल्याएको बताएका छन्। मंगलबार काठमाडौंमा आयोजित नेवाः तामाङ उपत्यका जागरण अभियान उदघाटन समारोहमा उनले माओवादीले नेपाललाई प्रतिनिधित्व गर्ने कुरामा रेकर्ड बनाए पनि प्रतिक्रियावादी, दलाल र बिचौलियाहरूलाई त्यो सह्य नभएको भन्दै उनीहरूले संख्याको बलमा षडयन्त्रपूर्ण तरिकाले आफूलाई सरकारबाट बाहिर ल्याएको बताए।
बिएल संवाददाता - काठमाडौं
प्रधानमन्त्री केपी शर्मा ओलीले हिमाल आरोहणलाई सुरक्षित बनाउन सरकार क्रियाशील रहेको बताएका छन्। अन्नपूर्ण हिमाल आरोहणको हीरक महोत्सवका अवसरमा मंगलबार म्याग्दीको अन्नपूर्ण गाउँपालिकाले वडा नम्बर- ४ को नारच्याङमा आयोजना गरेको समारोहलाई सम्बोधन गर्दै ओलीले हिमाल आरोहणको जोखिम घटाउन सरकारले काम गरिरहेको बताए। ‘हिमाल आरोहणको जोखिम घटाउन सरकारले दक्ष जनशक्ति तयार र आरोहणमार्गमा आवश्यक पूूर्वाधार तयार पारेका कारण सगरमाथा आरोहण गर्नेको सङ्ख्या बढेको हो,’ प्रधानमन्त्री ओलीले भने, ‘अन्नपूर्णलगायत हिमालका आधार शिविर जोड्ने पदमार्ग निर्माण र स्तरोन्नतिका कार्यक्रममा पनि सरकारको ध्यान गएको छ।’
बिएल संवाददाता - म्याग्दी
राष्ट्रिय मातृभूमि पार्टीले नेपाल वायुसेवा निगममा भएको भ्रष्टाचारविरुद्ध कारबाहीको माग गर्दै अख्तियार दुरुपयोग अनुसन्धान आयोगमा उजुरी दर्ता गराएको छ। राष्ट्रिय मातृभूमि पार्टीका अध्यक्ष रामशरण पाण्डेको टोलीले अख्तियारमा उजुरी दर्ता गराएको हो। वर्षौदेखि भ्रष्टाचार मौलाउँदै गएको नेपाल वायुसेवा निगममा कुनै पनि अधिकारीहरू माथि कारवाही हुन नसको हुँदा भ्रष्टाचारीविरुद्ध उजुरी दर्ता गराउन बाध्य भएको पाण्डेले बताए।
बिएल संवाददाता - काठमाडौं
काठमाडौं महानगरपालिकाको निमित्त नगरप्रहरी प्रमुखको जिम्मेवारी नगरप्रहरी उपरीक्षक विष्णु प्रसाद जोशीले पाएका छन्। नगरप्रहरी प्रमुख राजु पाण्डेलाई जाँचबुझका लागि भन्दै ६ महिनाका लागि निलम्बन गरेपछि प्रमुख प्रशासकीय अधिकृत सरोज गुरागाईंले एसपी जोशीलाई निमित्त प्रमुखको जिम्मेवारी दिएका हुन्। गुरागाईंले आजै प्रहरी प्रमुख एसएसपी पाण्डेलाई निलम्बन गरेका थिए।
बिएल संवाददाता - काठमाडौं
काठमाडौं महानगरपालिकाका प्रमुख प्रशासकीय अधिकृत सरोज गुरागाईंले नगर प्रहरी प्रमुख राजु पाण्डेलाई ६ महिनाका लागि निलम्बन गरेका छन्। गत चैत २१ गते प्रशासकीय प्रमुख गुरागाईंलाई महानगर कार्यालय प्रवेश गर्ने क्रममा पाण्डे नेतृत्वको नगर प्रहरीले उनलाई अवरोध गरेको थियो। सोही घटनाको छानबिनका लागि पाण्डेलाई बढीमा ६ महिनाका लागि निलम्बन गरे गुरागाईंले जाँचबुझ समिति बनाएका हुन्। समितिले प्रतिवेदन नबुझाएसम्मका लागि आजैका मितिबाट पाण्डेलाई निलम्बन गरिएको गुरागाईंले जानकारी गराएका छन्।
बिएल संवाददाता - काठमाडौं
भौतिक पूर्वाधार तथा यातायात मन्त्री देवेन्द्र दाहालले आकस्मिक समयमा काम गर्नसक्ने कानुन भएपनि अख्तियारले पत्र काटेर दुःख दिँदा समस्या भएको बताएका छन्। मंगलबार बसेको पूर्वधार विकास समितिको बैठकमा उनले खराब नियत भएका मान्छेहरूका कारण काम गर्दा प्रश्न उठ्ने गरेको दाबी गरे। उनले भने, ‘सार्वजनिक खरिदमा समस्या पारेको छ। कानून नभएको होइन। कानूनमा स्पष्ट उल्लेख छ, आकस्मिक समयमा पनि काम गर्न सकिन्छ। सात दिनमा सूचना दिएर पनि काम गर्न सकिन्छ। तर यस्ता कामहरू गर्दा अख्तियारले पत्र काटेर दुःख दिने काम गरिरहेको छ।’
बिएल संवाददाता - काठमाडौं
काठमाडौंको कालीमाटी तरकारी बजारमा नेपालका विभिन्न ठाउँबाट भित्रिएका तरकारीमा विषादीको अवशेष मापदण्डभित्र रहेको पाइएको छ। महानगरपालिकाको कृषि तथा पशुपन्छी विभाग र खाद्य प्रविधि तथा गुण नियन्त्रण विभागको संयुक्त टोलीले घुम्ती खाद्य प्रयोगशाला (मोबाइल भ्यान) सहित सोमबार राती १० बजेदेखि विहान ३ बजेसम्म भित्रिँदा भित्रिँदै गरेका १७४ वटा नमूना लिएर स्थलगत परीक्षण गर्दा यो नतिजा प्राप्त भएको हो। खाद्य प्रविधि तथा गुण नियन्त्रण विभागका वरिष्ठ खाद्य अनुसन्धान अधिकृत डा. ईश्वर सुवेदी भन्छन्, ‘नेपालका करिब २० जिल्लाबाट भित्रिएका तरकारीको नमूना संकलन गरेर परीक्षण गर्दा विषादीको अवशेष मापदण्डभित्र रहेको भेटिएको हो।’
बिएल संवाददाता - काठमाडौं
मंगलबारका लागि तोकिएको प्रतिनिधिसभाको बैठक दुईपटक सूचना टाँस गर्दा पनि नबसी स्थगित भएको छ। भिजिट भिसा प्रकरणमा मुछिएका गृहमन्त्री रमेश लेखकको राजीनामा माग्दै प्रतिपक्षी दलहरूले बैठक अवरुद्ध गर्ने तयारी गरेपछि भोलि १ बजेसम्मका लागि सूचना टाँस गरेर बैठक स्थगित भएको हो। बिहान ११ बजे बस्ने भनिएको बैठक दिउँसो दुई बजेका लागि सारिएको थियो। तर प्रतिपक्षी दलहरूले राजीनामालाई नै बटमलाइन बनाएर सदनमा बोल्न दिने माग राखेपछि बैठक बस्न नसकेको हो।
बिएल संवाददाता - काठमाडौं
संघीय संसदका प्रतिपक्षी दलहरू भिजिट भिसा प्रकरणमा मुछिएका गृहमन्त्री रमेश लेखकलाई सदनमा बोल्न दिन तयार भएका छन्। मंगलबार सदनको अवरोध खुलाउने विषयमा सभामुख र दलका प्रमुख सचेतकहरूको बैठक सकारात्मक रूपमा टुंगिएको छ। स्रोतका अनुसार गृहमन्त्रीको जवाफ चित्त बुझेमा सदनको अवरोध अन्त्य गर्न दलहरू सहमत भएका हुन्। यद्यपि गृहमन्त्रीलाई लामो समय बोल्नै नदिँदा असंसदीय व्यवहार देखिने र आलोचना हुने डरले विपक्षी दलहरू गृहमन्त्रीलाई बोल्न दिएपनि त्यसपछि राजीनामालाई बटमलाइन बनाएर अवरोध जारी राख्ने योजनामा रहेको बुझिएको छ।
बिएल संवाददाता - काठमाडौं
प्रतिनिधि सभाको बैठक बस्ने समय परिवर्तन भएको छ। मंगलबार बिहान ११ः०० बजे बस्ने गरी निर्धारण भएको प्रतिनिधि सभाको बैठक विशेष कारणले गर्दा आजै दिनको २ः०० बजे बस्नेगरी निर्धारण गरिएको संघीय सचिवालयका महासचिव पद्मप्रसाद पाण्डेयले जानकारी दिएका छन्। उनले बैठक निर्धारित समयमा वस्न नसक्ने भएकोले प्रतिनिधि सभा नियमावली, ०७९ को नियम ६ को उपनियम (२) को प्रतिबन्धात्मक वाक्यांश बमोजिम सभामुखले सभाको बैठक सारेको पनि जानकारी दिएका हुन्।
बिएल संवाददाता - काठमाडौं
प्रतिपक्षी दलको मंगलबार संघीय संसद भवनमा बसेको बैठकले गृहमन्त्री रमेश लेखकले राजीनामा दिएर भिजिट भिसा प्रकरणमा सहयोग गर्नुपर्ने निष्कर्ष निकालेको छ। प्रतिपक्षी दल माओवादी केन्द्र र राष्ट्रिय स्वतन्त्र पार्टीसहमतिका दलका नेताहरूले पहिलो चरणको बैठक सकिएको जानकारी दिँदै उक्त निष्कर्ष निकालेका हुन्। भिजिट भिसामार्फत मानव तस्करी प्रकरण र संघीय सदनको बैठकबारे माओवादी अध्यक्ष पुष्पकमल दाहाल प्रचण्डको संघीय सदनस्थित कार्यकक्षमा छलफल भएको थियो।
बिएल संवाददाता - काठमाडौं
सोमबारबाट एमाले नेता कार्यकर्ताहरूले आफूलाई झोले स्वीकार गर्दै म झोले हो अभियान जोडदार रुपमा चलाइरहेका छन्। शीर्ष नेतादेखि कार्यकर्ताहरूले सामाजिक सञ्जालमा म झोले हो भनिरहँदा सांसद गोकुल बास्कोटाले भने झोले अभियान बहिष्कार गरेका छन्। उनले सामाजिक सञ्जालमार्फत झोले अभियान प्रति असन्तुष्टि पोख्दै आफूलाई एमालेको कार्यकर्ता भएको र एमालेमा समाज बदल्ने क्रान्तिकारी सिद्धान्त भएको दाबी गरेका छन्।
बिएल संवाददाता - काठमाडौं
