कथायेँ: अध्याय एक

आलोकसिद्धि तुलाधरलाई जसै मैले सुदर्शनराज तिवारीसँगको कुराकानी सुनाएँ, उनले तुरुन्तै भेटौं भने। आलोकसँग मेरो पहिलो भेट साढे दुई वर्षअघि काष्ठमण्डप जीर्णोद्धारको रिपोर्टिङ क्रममा भएको थियो। उनले मलाई काष्ठमण्डपको भग्नावशेषमाथि चढाउँदै त्यसको जगमा रहेको नौ खण्ड देखाएका थिए, जसको विस्तृत म अर्को अध्यायमा चर्चा गर्नेछु।

रानीपोखरी जीर्णोद्धारको रिपोर्टिङ गर्दा पनि मैदान बनेको पोखरी स्थलमा हामी सँगसँगै गएका थियौं। उनी रानीपोखरी बचाउ अभियानका सक्रिय अभियन्ता थिए। त्यही सिलसिलामा मल्लकालीन पोखरीको झलक दिने पुराना सामग्रीहरू खोज्न हामी धेरै ठाउँ सँगसँगै गयौं। संस्कृति र सभ्यतामा गहिरो स्वअध्ययन गरेका आलोक कलेज ‘ड्रपआउट’ हुन्। पढाइ छाडेर केही समय पारिवारिक हस्तकला व्यवसाय सम्हाले। नेपाली हस्तकला बेच्न अमेरिकाको ‘सिलिकन भ्याली’ मा करिब छ महिना बस्दा सफ्टवेयरको संसारले उनलाई तान्यो। उनी त्यसैमा रत्तिए र लामो समय त्यही व्यवसायमा रहे।