सुर्खेत। कर्णालीका हिमाली जिल्लाहरू औलोको उच्च जोखिममा रहेका छन्। कर्णालीका दश जिल्लामध्ये हिमाली जिल्ला हुम्ला औलोको सबैभन्दा उच्च जोखिममा रहेको हुन्। 

खासगरी लामखुट्टेको टोकाइबाट लाग्ने र फैलिने औलोलाई मलेरिया पनि भनिन्छ। तराई क्षेत्रमा हुने लामखुट्टे विस्तारै पहाड हुँदै हिमालसम्मै पुग्न थालेपछि त्यस्ता सरुवा रोगहरू पनि फैलिंदै जान थालेका छन्। 

त्यस्तै कालीकोट, दैलेख र सुर्खेत औलोको जोखिममा रहेको कर्णाली प्रदेश स्वास्थ्य निर्देशनालयका भेक्टर कन्ट्रोल सुपरभाइजर अधिकृत श्यामलाल आचार्यले जानकारी दिए। 

हुम्लामा भेटिएका दुई जना औलो रोगका बिरामीमध्ये एउटा स्थानीयस्तरमा रोग लागेको भेटिएकोले हुम्ला जिल्ला उच्च जोखिममा रहेको उनले भताए। चालू आर्थिक वर्षमा कर्णालीमा ३८ जना औलोको बिरामी पत्ता लागेको र हुम्लामा भेटिएका एक जना बाहेक अरु आयातित बिरामी भएको आचार्यले बताए। 

चालू आर्थिक वर्षमा कर्णाली प्रदेशमा सुर्खेतमा २९, दैलेखमा ४, कालिकोटमा ३ र हुम्लामा १ जना औलो रोगका बिरामी फेला परेको आचार्यले जानकारी दिए। 
‘३७ जना आयतित औलो रोगमा बिरामी भेटिएका छन्,’ उनले भने,‘एक जनामा स्थानीय औलोका बिरामी भेटिएका हुन्’ उनले भने। 

कर्णालीका चार जिल्लामा भेटिएका औलो रोगका बिरामीमध्ये हुम्लाको ताजाकोट गाउँपालिका, दैलेखको आठबिस नगरपालिका, चामुण्डा बिन्द्रासैनी नगरपालिका, दुल्लु नगरपालिका, ठाटीकाँध गाउँपालिका, कालिकोटको खाँडाचक्र नगरपालिका, सुर्खेत जिल्लाका बराहताल गाउँपालिका वीरेन्द्रनगर नगरपालिका, चौकुने गाउँपालिका गुर्भाकोट नगरपालिका, लेकबेँसी नगरपालिका, पञ्चपुरी नगरपालिका र सिम्ता गाउँपालिकामा औलो रोगका बिरामी रहेको आचार्यले बताए।

त्यस्तै, कर्णालीका ७९ स्थानीय तहका सात सय १८ वडामध्ये तीन वडा औलो रोगको उच्च जोखिम रहेको, सात वटा वडा मध्यम जोखिम रहेको, चार सय १० वटा वडा निम्न जोखिम रहेको र दुई सय ९८ वडामा जोखिम नरहेको आचार्यले जानकारी दिए। 

उच्च जोखिममा रहेको वडामध्ये हुम्ला ताजाँकोट गाउँपालिका वडा नं २, ३ र ४ रहेको छन्। न्युन जोखिममा सुर्खेत वीरेन्द्रनगर नगरपालिका वडा नं। २, गुर्भाकोट नगरपालिका वडा नं। ८, मुगु खत्याड गाउँपालिका वडा नं। ८, सोरु गाउँपालिका वडा नं। ४, ५, हुम्ला जिल्लाको अदानचुली गाउँपालिका वडा नं।३ र ताजाँकोट गाउँपालिका वडा नं ५ रहेको आचार्यले बताए।