मधेसका जिल्लाहरूमा ‘नक्कली’ अस्पताल र नक्कली ‘डाक्टर’हरूको बिगबिगी बढ्न थालेपछि केही दिनदेखि मुख्यमन्त्री आफै अस्पतालहरूको अनुगमनमा व्यस्त छन्।
मधेश प्रदेशका मुख्यमन्त्री सतिशकुमार सिंहले विभिन्न जिल्ला पुगेर आफै अस्पतालहरू अनुगमन गर्छन् र ‘अन द स्पट’ कारबाहीको निर्देशन दिँदै आएका छन्। केही महिनायता तराई-मधेसका सयौं अस्पतालहरू उनले बन्द गर्न निर्देशन दिएका छन्।
निजी क्लिनिकका नाममा ‘अवैध’ अस्पताल सञ्चालन गरेको र बिना प्रमाणपत्रका डाक्टरहरूबाट बिरामी चेकजाँच एंव उपचार गर्दै आएका कैयौं पोलिक्लिनिक, अस्पताल र मेडिकलहरू उनले बन्द गराएका छन्। कतिलाई नवीकरण गर्ने छुटसँगै सच्चिने मौका पनि दिइएको छ।
बिहीबार दिनभरि पनि मुख्यमन्त्री सिंह अस्पतालहरूको अनुगमनमै व्यस्त रहे।
उनले सर्लाही सदरमुकाम मलंगवास्थित प्रादेशिक अस्पताल र अन्य निजी अस्पताल तथा पोलिक्लिनिक गरी १९ वटाको अनुगमन गरेका छन्।
बिहीबार साँझ अनुगमनका क्रममा १९ मध्ये अवैध र अनाधिकृत ढङ्गले सञ्चालनमा रहेका १५ वटा अस्पताल र पोलिक्लिनिकलाई बन्द गर्न मुख्यमन्त्री सिंहले निर्देशन दिएका छन्। सेवा सञ्चालन अनुमति लिएका तीन निजी स्वास्थ्य संस्थालाई भने उनले दुई महिनाभित्र नवीकरण गर्न निर्देशन दिएका छन्।
प्रदेशको स्वास्थ्य तथा जनसंख्या मन्त्रालयका जनस्वास्थ्य अधिकृत एवम् अस्पताल अनुगमन समितिका सदस्यसचिव सन्तोषकुमार ठाकुरका अनुसार प्रादेशिक अस्पतालमा बिरामीलाई निःशुल्क खुवाइने खाना स्वच्छ नभएको पाइएपछि मुख्यमन्त्री सिंहले खाना खुवाउने क्यान्टिन नै परिवर्तन गर्न प्रादेशिक अस्पतालका प्रमुखलाई निर्देशन दिएका छन्।
प्रादेशिक अस्पतालका आकस्मिक कक्षका लागि निर्धारित जनशक्ति पूर्णतामा परिचालन गर्न र अन्तरङ्ग कक्षमा लेखिएका एम्बुलेन्स चालकका नाम मेटाउन पनि निर्देशन दिएका छन्।
मुख्यमन्त्री सिँहले अस्पताल अनुगमन गरिरहेको हल्ला फिजिएपछि मलंगवा बजारका अधिकांश निजी अस्पताल तथा पोलिक्लिनिक बन्द गरी सञ्चालक तथा कर्मचारी फरार भएका थिए।
‘चार–पाँच बाहेक सबै निजी स्वास्थ्य संस्थामा ताल्चा लागेको पाइयो, तीमध्ये तीनवटासँग मात्र नवीकरण नभएका सेवा सञ्चालन अनुमतिपत्र फेला परे,’ स्वास्थ्य तथा जनसँख्या मन्त्रालयका जनस्वास्थ्य अधिकृत ठाकुरले भने।
अनुगमनक्रममा जयश्री ओम हेल्थ केयर प्रालि, तिरुपति बालाजी पोलिक्लिनिक प्रालि र बह्मभूमि हेल्थ रिसर्च प्रालिलाई दुई महिनाभित्र नवीकरण गराउन निर्देशन दिइएको मुख्यमन्त्री सिंहका प्रेस सल्लाहकार अनिलकुमार कर्णले जानकारी दिए।
मुख्यमन्त्री सिंहका प्रेस सल्लाहकार कर्णका अनुसार मलंगवास्थित मैक्स हस्पिटल, मिथिला डेन्टल क्लिनिक, दिनकर अस्पताल, रामावतार पेन पारालाइसीस सेन्टर, क्ल्याण हेल्थ केयर, शीतल डेन्टल केयर प्रालि, चन्द्रकला पोलिक्लिनिक, इन्डो नेपाल आँखा अस्पताल, कान्तिपुर डेन्टल एवम् एक्सरे क्लिनिक, प्रेमा हेल्थ क्लिनिक, सर्लाही कम्युनिटी हेल्थ केयर प्रालि, गुप्ता क्लिनिक प्राथमिक उपचार केन्द्र, सर्लाही पोलिक्लिनिक, सिद्धिदाता हेल्थ केयर प्रालि र देवश्री पोलिक्लिनिक प्रालिलाई बन्द गर्न निर्देशन दिइएको छ।
बिहीबारको अनुगमनसँगै मुख्यमन्त्री सिंहले जनकपुरधाम, महोत्तरीको बर्दिवास, सर्लाहीको हरिवन, रौतहटका चन्द्रपुर र गरुडा, पर्साको वीरगन्जसहितका ठाउँमा ११४ निजी स्वास्थ्य संस्थाको अनुगमन गरेका छन्। अनुगमन ७३ वटा निजी स्वास्थ्य संस्थालाई बन्द गर्ने निर्देशन दिइएको छ।
