वर्षकै प्रतिक्षितमध्येको एक सिनेमा ‘लाज शरणम्’ महाशिवरात्रीको अवसर पारेर बुधबारबाट प्रदर्शनमा आएको छ।
चलचित्रको अग्रिम बुकिङ उत्साहजनक देखिएको छ। सोमबार साँझबाट हलले अग्रिम बुकिङ खुला गरेको सिनेमामा उत्साहजनक टिकट बुकिङ देखिएको हो।
कतिपय हलका शो मंगलबार दिउँसो नै हाउसफुल भइसकेका थिए। ललितपुरको लाबिम मल, भक्तपुरको भाटभटेनीस्थित क्यूएफएक्स, बानेश्वरको आईएनआईलगायत हलका केही शो हाउसफुल भइसकेका छन्।
काठमाडौंको सिभिल मललगायतका हलमा पनि अधिकांश टिकट बिक्री भइसकेका छन्। रिलिजको २४ घण्टा अगाडि नै अधिकांश शोहरू हाउसफुल हुनु र धेरै अग्रिम बुकिङ हुनु चलचित्रको राम्रो व्यापार गर्ने संकेत हो।
अग्रिम बुकिङ राम्रो हुँदा मल्टिप्लेक्स सिनेमा हलहरूले शो थप्न थालेका छन्। काठमाडौंमा क्यूएफएक्सले दुई शो थपिसकेको छ। शो खोल्दा काठमाडौंमा क्यूएफएक्सले २९ शो दिएकोमा अहिले ३१ शो छ।
तुलनात्मक रूपमा अग्रिम बुकिङ जुन चलचित्रको राम्रो छ, अरुको शो घटाएर उसलाई हलहरूले शो थप्दै जान्छन्। यो चलचित्रले देशभर करिब दुई सय शो पाएको छ।
लोकप्रिय हास्य टेलिश्रृंखला ‘सक्किगोनी’को टिमले निर्माण गरेको चलचित्र ‘लाज शरणम्’मा मुख्य भूमिकामा सिताराम कट्टेल (धुर्मुस) छन्। चलचित्रलाई कुमार कट्टेलले निर्देशन गरेका छन्।
विजय बराल, अर्जुन घिमिरे, सागर लम्साल, हरिष निरौला, प्रियाना आचार्य, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ, माला लिम्बूलगायत कलाकारको अभिनय छ।
जेपीटी क्रियसनको ब्यानरमा बनेको सिनेमाका निर्माता नवीन श्रेष्ठ हुन् भने राम नरेश शाह र सिर्जना खड्का सह-निर्माताका रूपमा रहेका छन्।
