‘नो केबलकार’ बन्दका कारण कोशी प्रदेशसभाका सांसदहरू समेत संसद बैठकमा सहभागी हुनबाट रोकिएका छन्।
सोमबारको प्रदेश सभाको बैठकमा आफू बन्दका कारण आउन नपाएको प्रदेश सभाकी सांसद विद्या चाम्लिङ राईले बताइन्।
‘स्वास्थ्यमा केही समस्या पनि भएर हो। बन्दले बाहिर अफ्ठेरो अवस्था पनि थियो,’ उनले भनिन्, ‘कतिपय माननीयहरू बन्दमा केही होला की भनेरै पनि नजाने भन्नुभएको थियो।’
कोशी प्रदेश सभाका सभामुख अम्बरबहादुर विष्टले बन्दको प्रभाव सदनमा पनि देखिएको बताए।
उनले भने, ‘कांग्रेसका प्रमुख सचेतक गोपाल तामाङदेखि कतिपय माननीयले बन्दका कारण नै सदन आउन नसक्ने बताउनुभएको थियो। उपस्थिति हुन नसक्नुभएका माननीयले जानकारी गराउनुभएको छ। त्यसमा बन्दका कारण भनेर पनि कतिपय माननीय हुनुहुन्छ।’
प्रदेश सभा सचिवालयका अनुसार प्रदेश सभाका ९३ जना सदस्यमा सोमबारको बैठकमा ४२ जना सदस्य उपस्थित भएका छन्। सोमबारको प्रदेश सभा बैठकमा ‘कोशी प्रदेश खानेपानी तथा सरसफाइ सम्बन्धमा व्यवस्था गर्न बनेको विधेयक’ सभामा पेस भएर सैद्धान्तिक छलफल सुरु भएको छ।
वार्ताबाट समाधान निकाल्न माग
पाथीभरा केबलकार विवादका सन्दर्भमा सबैभन्दा पहिले पाथीभरा क्षेत्रमा रहेको फौज फिर्ताका साथ काम रोकेर वार्ता गर्न माओवादी सांसद गणेश उप्रेतीले सरकारलाई सुझाव दिए। बैठकमा विशेष समय लिएर बोलेका सांसद उप्रेतीले भने, ‘सरकार वार्ता गर्ने समयमा गोली हान्न अगाडि सर्यो। विकास पनि शान्तिपूर्ण ढङ्गबाट मात्रै गर्नु पर्दछ । उनले भने, सरकारले काम रोकेर र सुरक्षा फिर्ता बोलाएर वार्ताको टेबलमा बस्नु पर्दछ।’
यस्तै ताप्लेजुङकी जसपा सांसद निर्मला लिम्बुले केबलकार निर्माण गर्नु मानव सभ्यतामाथिकै आक्रमण हुने भन्दै चिन्ता व्यक्त गरिन्। उनले भनिन्, ‘विकासको नामले सिङ्गो मानव समुदाय र सिङ्गो लिम्बु समुदायको अस्तित्वको विनाश गर्छ।’
लिम्बुले आन्दोलनका क्रममा पक्राउ परेकाहरूलाई तुरुन्त रिहाइ गर्न माग समेत गरिन्।
पाथीभरा क्षेत्रमा केबलकार निर्माणका विपक्षमा केबलकार निर्माण खारेजी समिति, मुक्कुमलुङ संयुक्त सङ्घर्ष समिति, प्रदेश १ पुनः नामाङ्कन संयुक्त सङ्घर्ष समिति, किराँत धर्म तथा साहित्य उत्थान संघ, पहिचानका लागि युवा जिल्ला समिति र किराँत याक्थुङ चुम्लुङ जिल्ला समितिलगायत संघसंस्था यति बेला आन्दोलनमा छन्।
उनीहरूले आइतबार र सोमबार (हिजो र आज) कोशीका सुनसरी, मोरङ, झापा, इलाम, पाँचथर, ताप्लेजुङ, धनकुटा, तेह्रथुम र सङ्खुवासभामा बन्दको घोषणा गरेका छन्। जसको प्रभाव कोशी प्रदेश सभासम्मै देखिएको हो।
आन्दोलनमा होमिएका विक्रम लिम्बुले यो बन्द साङ्केतिक बन्द मात्रै भएको बताए। केबलकार निर्माण कार्य नरोकिए जस्तोसुकै आन्दोलन गर्न पनि तयार रहेको उनको भनाई छ।
