भारतको राजधानी नयाँ दिल्लीमा सोमबार ‘ईन्डो नेपाल सुजन म्युजिक अवार्ड- २०२४’ सम्पन्न भएको छ। लोकसंस्कृतीको जर्गेना गर्ने उद्देश्यले गरिएको उक्त कार्यक्रममा नेपाल र भारतका दर्जनौं कलाकारहरूको उपस्थिति थियो।
अवार्ड कार्यक्रममा विभिन्न बिधाहरूमा विजेता कलाकारहरूलाई अवार्ड प्रदान गरियो। उक्त कार्यक्रममा लोकदोहोरी गायिका एवं मोडल रिया रेग्मीले ‘रहरै भो’ गीतबाट सर्वोत्कृष्ट नवमोडलको अवार्ड हात पारेकी हुन। कलाकारिताको छेत्रमा प्रवेश गरेको २ वर्षमै रियाले यो अवार्डलगायत धेरै सफलताहरू हात पार्न सफल भएकी छन्।
रियालाई वरिष्ठ गायिका शर्मिला गुरुङ, वरिष्ठ गायक इन्द्र जीसीको हातबाट बेस्ट म्युजिक भिडियो मोडलको अवार्ड बितरण गरिएको थियो। अवार्ड वितरणपछि विजेताहरूले अझै यस छेत्रमा थप लगनशील हुँदै अगाडी बढ्ने बताए।
सुजन म्युजिक प्रालिकी अध्यक्ष जमुना रानाकाअनुसार भारतमा नेपालीहरूको अवार्ड कार्यक्रम यो दोस्रो पटक हो।
सुजन म्युजिक प्रालिको आयोजनामा नेपाल र भारतमा रहेका संगितकर्मीहरूको नेपाली गित संगीतप्रतिको योगदानलाई सम्मान गर्न यसवर्ष पनि अवार्ड कार्यक्रम भएको हो। अवार्ड कार्यक्रमको लागि मनोनयन फारम खुल्ला गरेर सम्पुर्ण प्रक्रिया पूरा गरि भोटिङ गरेर धेरै भोट आएकालाई विजयी घोषणा गरिएको थियो।
कार्यक्रममा विभिन्न ३३ विधामा अवार्ड वितरण गरिएको छ भने सांगीतिक क्षेत्रमा योगदान दिएका विभिन्न व्यक्ति र स्रष्टाहरूलाई पनि सम्मान गरिएको आयोजक कमिटीकी अध्यक्ष गायिका रानामगरले बताइन्। अवार्ड कार्यक्रमको नोमिनेशन नेपालमा भएको थियो भने अवार्डको फाईनल कार्यक्रम भारतको नयाँ दिल्लीमा भएको हो।
अवार्डका बिधाहरूमा राष्ट्रिय भावको गीत, सर्वोत्कृष्ट लोक दोहोरी गीत, सर्वोत्कृष्ट एकल लोकगीत गायक/गायिका, सर्वोत्कृष्ट मौलिक गीत गायक/गायिका, सर्वोत्कृष्ट गायक/गायिका, सर्वोत्कृष्ट मोडल, सर्वोत्कृष्ट नयाँ मोडल, सर्वोत्कृष्ट भाका, सर्वोत्कृष्ट शब्द रचनाकार, सर्वोत्कृष्ट नवगायक/गायिकालगायत गित संगीतको क्षेत्रमा रहेका सर्वोत्कृष्ट कलाकारहरूको लागि राखिएको छ।
माघ १३ गते भारतको नयाँदिल्लीमा रहेको प्यारेलाल भवनको आईटीओमा ख्यातिप्राप्त कलाकारहरूको बीचमा सांस्कृतिक कार्यक्रमसहित उक्त कार्यक्रम सम्पन्न भएको थियो।
नेपाली गीतसंगीतको संरक्षण र सम्वर्द्धन गर्ने उद्धेश्यले वि.सं. २०७० सालमा स्थापना भएको सुजन म्यूजिक प्रालि नेपाली गीत, संगीतको क्षेत्रमा क्रियाशील नेपालको सक्रिय म्युजिक उत्पादक संस्था हो।
नेपाली गीतसंगीतको उत्पादन तथा प्रकाशनको गौरवमय यात्रामा थुप्रै गीतसंगीतकर्मीसँग सहकार्य गर्दै गीतसंगीतका सयौं रचनाहरू भौतिक तथा डिजिटल प्रविधिमा प्रकाशन गरी नेपाली तथा अन्य भाषाभाषीका गीतसंगीतको क्षेत्रमा यस संस्थाले छुट्टै योगदानका साथ पहिचान बनाउन सफल भएको छ।
यस्तो कार्यक्रमले नेपाली गीतसंगीतको क्षेत्रमा क्रियाशील अग्रज श्रष्टाहरूलाई सम्मान तथा गीतसंगीतको क्षेत्रमा नेपाल तथा भारतमा क्रियाशील गीतसंगीतकर्मीहरूको सहकार्यलाई प्रोत्साहन हुने आयोजक कमिटी अध्यक्ष रानामगरले बताईन।
