नेपाल विद्युत् प्राधिकरणका कार्याकारी निर्देशक कुलमान घिसिङले देशमा लोडसेडिङ हुँदा रमाउने जमात देखिएको गुनासाे गरेका छन्।
शुक्रबार नेपाल पूर्वाधार पत्रकार समाजको तेस्रो वार्षिक साधारण सभा तथा दोस्रो अधिवेशनमा बोल्दै उनले लोडसेडिङ हुँदा रमाउने जमातले नै लोडसेडिङको हल्ला फैल्याएको आरोप लगाए।
‘नेपालमा नकारात्मक कुराहरुको जमात बढ्दो छ। देशमा लोडसेडिङ हुँदा रमाउने जमात धेरै देखेँ। लोडसेडिङ हुँदा रमाउने जमातले नै लोडसेडिङको हल्ला फैल्याइरहेका हुन्छन्। तर विद्युत प्राधिकरण नाफामा गयो भन्नासाथ एकदमै खुसी नहुँने र घाटामा गयो भने एकदमै खुसी हुने जमात पनि छ’, उनले भने।
उनले अहिले लोडसेडिङ नभएर आयोजनाहरूमा आएको प्राविधिक कारणले केही घण्टा जलविद्युत् वितरणमा समस्या भएको बताए। माथिल्लो तामाकोसी र कालीगण्डकी बन्ने बित्तिकै लोडसेडिङको समस्या समाधान हुने उनको भनाइ छ।
उनले धेरै पूर्वाधारहरु बनाउनुपर्ने भए पनि बजेट अभावका कारण बन्न नसकेको बताए।
उनले भने, ‘हामीसँग बजेटको अभाव छ। लिमिटेड मात्र बजेट हामीसँग छ। धेरै पूर्वाधारहरु बनाउनुपर्नेछ। अर्थमन्त्रालयबाट बजेटको धेरै आशा पनि गर्न सकिँदैन। तर यसमा राज्यले बढि हेर्नुपर्छ। नेपालको पूर्वाधार क्षेत्रमा ठूलाठूला विकासका परियोजनाहरूको काम भइरहेको छ। बत्ती र बाटोको विकास भएको छ। जुन हाम्रो ठूलो पूर्वाधारको विकासको आधार हो। नेपालको विद्युत् क्षेत्रको ठूलो विकास हुनेछ, यसका लागि ठूलो लगानी आवश्यक छ। ठूला परियोजनहरूका लागि वैदेशिक लगानी चहिन्छ।’
