सुनसरीको धरान उपमहानगरपालिका–१३ अमरहाटबाट मंगलबार राति प्रहरीले ६ सय ९० किलोग्राम गाँजा बरामद गरेको छ।

सरकारी नम्बर प्लेट भएका दुई गाडीहरूमा लुकाएर ओसारपसार हुँदै गरेको उक्त गाँजा प्रहरीको कडा निगरानीमा फेला परेको हो।

प्रहरीका अनुसार बा.१ झ ४६०५ नम्बरको स्कार्पियो गाडीबाट ३ सय ३० किलोग्राम गाँजा बरामद गरिएको हाे।

गाडीका चालक ३६ वर्षीय श्यामकुमार विकलाई पक्राउ गरिएको छ। उनी मोरङका निवासी हुन्।

अर्को गाडी बा.१ झ ५१२७ नम्बरको स्कार्पियो पनि प्रहरीले तलासी गर्दा ३ सय ६० किलोग्राम गाँजा बरामद गरेको छ।

गाडीहरूमा गाँजा लुकाएर ढुवानी भइरहेको भन्ने सूचना प्राप्त भएसँगै प्रहरी टोलीले तत्काल छानबिन सुरु गरेको थियो। विकलाई पक्राउ गर्दा अर्का गाडीको चालक भाग्न सफल भएका थिए। पछि सोही गाडी फेला पारेर तलासी गर्दा गाँजा समातिएको थियो।

प्रहरीले फरार चालकको खोजी भइरहेको र यस घटनामा थप अनुसन्धान भइरहेको जनाएको छ।