नेकपा (एमाले)का अध्यक्ष केपी शर्मा ओलीले मुलुकको अर्थतन्त्र सुधार गर्नका लागि सबै प्रतिबद्ध हुनुपर्ने बताएका छन्।

नेपाल उद्योग तथा व्यवसायी महासङ्घले आज यहाँ आयोजना गरेको ‘निजी क्षेत्रसँग एमाले’ विषयक अन्तरक्रियामा उनले अर्थतन्त्र सुधार गर्नका लागि सबै लाग्नुपर्ने बताएका छन्।

‘अर्थतन्त्र सुधार गरेर छाड्ने कुरामा हामी प्रतिबद्ध रहेका छौँ। अब ढिलो गर्ने वा पर्खने अवस्था हामीसँग छैन।’ अध्यक्ष ओलीले अहिले सबै देशप्रति गम्भीर हुनुपर्ने अवस्था रहेको भन्दै अहिलेको अवस्थामा सामान्य हिसाबले लिन नहुने बताएका छन्।

‘सिटामोल खाएर काम लाग्ने स्थिति छैन। एक दिनको ज्वरो पनि हट्दैन’, उनले भने, ‘मुलुकको अर्थतन्त्रको खास उपचार गर्नुपर्दछ। त्यसको लागि हामी सबै गम्भीर बन्नुपर्दछ।’

देशको अवस्थाप्रति चिन्ता र त्यसबाट उन्मुक्ति कसरी मिल्छ भन्ने कुरामा निजी क्षेत्रसँग मिलेर अगाडि बढ्ने उनको धारणा राखेका छन्। अध्यक्ष ओलीले देश आर्थिक हिसाबले सबल बन्नुपर्ने उल्लेख गर्दै गरिबीबाट नेपाली जनतामाथि उठाउनुपर्ने बताएका छन्। मानिस धनी हुनुपर्नेमा गरिबी बन्दै गएको भन्दै उनले देशलाई परिवर्तन ल्याउनुपर्ने भनाइ राखेका छन्।

अहिलेको अवस्थाबाट मुलुक अगाडि बढ्न नसक्ने भन्दै उनले अर्थतन्त्रमा सुधारको लक्षण नदेखिएको बताएका हुुन्। उद्यमी व्यवसायीले बढी राजनीतिक गर्ने गरेको उल्लेख गर्दै अध्यक्ष ओलीले अहिले सबैको सहकार्यबाट मात्र मुलुक अगाडि बढ्ने बताएका छन्। उनले सरकारी सम्पत्तिलाई निजी बनाउनेलाई सरकारले कारबाही गर्नुपर्ने भनाइ राखेका छन्। अध्यक्ष ओलीले चलायमान ठाउँमा र वैदेशिक रोजगारबाट आएको मुद्रा थुप्रिएको बताए। 

‘कतिपय ठाउँमा बजेट छ। तर चलायमान छैन। वैदेशिक मुद्रा पनि थुप्रिएको छ। वैदेशिक अध्ययनका लागि जाने विद्यार्थीले लिएर जानेबाहेक अरु काम भएको छैन’, उनले भने, ‘चलायमान ठाउँमा थुप्रिएको पैसालाई स्थान्तरण गरेर चलायमान गराउनुपर्दछ।’

अध्यक्ष ओलीले मुलुकको अर्थतन्त्र सुधार गर्नका लागि कुनै दिन दबाबमूलक काम गर्ने परे एमालेले अगुवाइ गर्ने बताएका छन्। उनले एमालेलाई सरकारमा जान हतार नभएको भन्दै उनले आफूहरु मिसन–२०८४ मा लागेको बताएका छन्।