नक्कली भुटानी शरणार्थी प्रकरणमा १६ जना पक्राउ परिसकेका छन् । पक्राउ पर्नेमा पूर्व उपप्रधानमन्त्री तथा नेकपा एमालेका टोपबहादुर रायमाझी र पूर्व गृहमन्त्री तथा नेपाली कांग्रेसका नेता बालकृष्ण खाण राजनीतिक रुपमा प्रभावशाली नेता हुन् ।
यस अतिरिक्त एमाले उपाध्यक्ष तथा पूर्व गृहमन्त्री रामबहादुर थापाका छोरा प्रतीक र गृहमन्त्रीका तत्कालीन सुरक्षा सल्लाहकार इन्द्रजीत राई पनि यो घटनाका आरोपित हुन् । त्यसैले आफ्नो छोरा र सुरक्षा सल्लाहकार नै यो प्रकरणमा तानिएको अवस्थामा तत्कालीन गृहमन्त्री रामबहादुर थापा ‘बादल’ले कति नैतिक जिम्मेवारी लिने भन्ने प्रश्न एकातिर छ भने उनै गृहमन्त्री बादल रहेको मन्त्रिपरिषदको नेतृत्व गरेका तत्कालीन प्रधानमन्त्री केपी शर्मा ओलीको नैतिक जिम्मेवारीमाथि पनि प्रश्न उठेको छ ।
