अहिले राजनीति क्षेत्रमा सबै कुरा नयाँ नै राम्रो र असल हो, पुरानो सबै खराब र कमसल भन्ने विचार विकास हुँदै गएको छ । खराबी नयाँ र पुराना सबैमा हुन्छन् । तर पुराना दलको खराबीलाई नयाँ दलले पहिचान गर्न सक्नुपर्छ । नयाँ दलका जोशलाई पुराना दलले सार्थक परिणतिमा पुर्याउन मद्दत गर्छ ।

आजको राजनीतिले अनुहार, उमेर र स्वरमा नयाँ नभएर शैली, चिन्तन, व्यवहार र संस्कारमा नयाँपन खोजेको छ । यसर्थ विकल्प हो तर पुरानाको विकल्प नयाँ होइन । नयाँ नयाँ हुनुपर्छ । तर त्यसले समाजलाई हेर्ने, सामाजिक समस्या निराकरण गर्ने, असन्तोष र विद्रोहलाई सम्बोधन गर्ने दार्शनिक धरातल सुस्पष्ट हुनुपर्छ । फरक तरिकाले ‘डेलिभरी’ गर्ने नीति तथा कार्यक्रम बन्नुपर्छ । पुरानाले गरेनन् अब नयाँ भन्ने कुरा गर्दा अनुहारमा पुस्ता फरक होला तर तरिकामा फरक नहुन सक्छ ।