असनको दगुबहाः मा रहेको बुद्धको मूर्तिलाई सिँगारेर बसिरहन्छन्, वीरेन्द्र चित्रकार। उनले यस विहारको सरसफाई र रङ्गरोगनको जिम्मा लिएको २० वर्षभन्दा बढी भइसक्यो।
विहारको संरचनामा केही कमजोरी देखियो कि उनको काम सुरु हुन्छ। तर, वीरेन्द्रको मूल पेशा भने होइन यो। थरजस्तै उनी पेशाले पनि चित्रकार नै हुन्। तर हिजोआज मूर्तिकारको रूपमा व्यस्त भइरहेका छन् उनी।
उनको पुर्ख्यौली काम पनि 'चित्रकारी' नै हो। नेवार समुदायका सांस्कृतिक काममा चाहिने सबैजसो चित्र उनले कोर्ने गरेका छन्।
'जातिले पाएको काम हो यो। पहिला राणाहरूले चित्रकारलाई बोलाऊ भन्थे रे। अनि उनीहरूले जेजे भन्यो त्यही लेख्न जान्ने भएर चित्रकार भनेर जाति बनायो रे', उनले भने।
घरको मूल ढोकामा पञ्चबुटी, शिव लेआकृति,अनि कुरितो लगायतको सबै परम्परागत चित्रहरू उनी बनाउँछन्।
तर चित्रकारीले मात्र जीविका चलाउन नसक्ने भएकाले मूर्ति रङ्गाउन पनि जानेका छन् उनले। मूर्तिमा सुनको जलप पनि गर्छन्।
