‘तपाईहरूले हामीजस्ता सन्तानको अनुहार हेरेर भोट हाल्नुभयो?’ एकजना युवा आक्रोशित भएर चिया खाइरहेका केही पाका मानिससँग कुरा गर्दै थिए। ‘राम्रो मान्छे आए हामीले विदेश जानुपर्दैनथ्यो,यहीँ गरिखान पाइन्थ्यो।’

वैशाख ३० को स्थानीय तह निर्वाचन परिणाम देशैभरिबाट आइरहेको छ। केही दिनयता कसले कति ल्यायो? को अगाडि छ आदि/इत्यादिमै सबैको ध्यान छ। चुनावी समाचारको बीचमा बिहान घुम्न निस्कँदा जहिल्यै यस्ता संवाद कानमा पर्छन्।

यस्ता अनेकन संवादमध्ये बुधबार बिहान जगडोलको एउटा चिया पसलअगाडि मोटरसाइकलमा बसेका एक दाह्रीवाल युवाका यी कुरा सुन्दै म अगाडि बढिरहेको छु। एक हिसाबले यो बालेन पुस्ता हो।बालेन अर्थात् बालेन्द्र शाह, जो यतिबेला घर–घरको चर्चाको विषय बनेका छन्। सबै गाउँपालिका र नगरपालिकामा बालेन थिएनन् तर उनीजस्ता उम्मेदवार अवश्य थिए। यस्ता उम्मेदवारले जित्नुपर्छ भन्ने मान्यता यसपटक सबैका मनमा रहेको देखिएको छ।