नेपाली कांग्रेस र कम्युनिस्ट गठबन्धनको संयुक्त जनआन्दोलनबाट २०४६ सालको अन्तिम साता बहुदलीय व्यवस्था पुनर्स्थापना भएपछिको सामाजिक विभाजन उदेकलाग्दो थियो। ओल्लोघर–पल्लोघर, ओल्लोटोल–पल्लोटोल सबै कांग्रेस र कम्युनिस्टमा विभाजित भए। प्रतिनिधिसभाको चुनावसम्ममा पञ्चहरूको पार्टी पनि थपियो।
विभाजन कस्तोसम्म भने बोलचाल र आउजाउ बन्द, बिहे–बर्तमनको निम्तो पार्टी हेरेर, पार्टी विचार गरेर मात्रै बिहेबारी, मलामीमा समेत शवको पार्टीअनुसारको लर्को; साँच्चै अनौठो भएथ्यो।
