खोटाङको रावाबेँसी गाउँपालिका–३ लामिडाँडास्थित लामिडाँडा विमानस्थल उपयोग विहीन बनेको छ। कालोपत्रे गरिएपछि ३ असार २०७६ मा सफल परीक्षण उडान भरिएको लामिडाँडा विमानस्थलमा नेपाल नागरिक उड्डयन प्राधिकरणले नियमित उडानको व्यवस्था गर्न नसकेको हो। खोटाङका तीन वटा विमानस्थलमध्ये लामिडाँडा विमानस्थल सबैभन्दा पुरानो विमानस्थल हो । कालोपत्रे भएको लामिडाँडा विमानस्थल परीक्षण उडानमै सीमित भएपछि स्थानीय निराश छन् । 

साबिकको सदरमुकाम दिक्तेल नजिकै मनमाया राई खानीडाँडा विमानस्थल सञ्चालनमा आएपछि लामिडाँडा विमानस्थल बन्दजस्तै बन्न पुगेको हो। दिक्तेल रुपाकोट मझुवागढी नगरपालिका–४ खाल्लेमा रहेको खानीडाँडा विमानस्थलमा बेलाबेला उडान भइरहँदा लामिडाँडा विमानस्थल सुनसान छ ।

कालोपत्रे गर्नु अगाडि उडान हुँदैआएको लामिडाँडा विमानस्थलमा कालोपत्रेपछि भने उडान रोकिएको हो। सेड्युलमा उडान नहुँदा र यात्रु नपाउँदा लामिडाँडामा उडान रोकिएको स्थानीय युवा नेता खेमराज देउसाली बताउँछन्। 

‘हप्तामा एक दिन सेड्युल हुने। सेड्युल भएका दिन पनि उडान नहुने । जहाज पर्खंदा कति बिरामीले ज्यान गुमाए,’ देउसालीले भने, ‘उडान हुने भनेको दिन उडान नभएपछि धेरैपल्ट यात्रु ढाँटिए, बिस्तारै यात्रु घटे । त्यसपछि उडान नै रोकिएको हो ।’ 

हिजोआज कच्ची सडक बनेपछि गाउँ गाउँमा यात्रुवाहक सवारी साधन पुग्ने वातावरण बनेको छ। लामिडाँडा विमानस्थलबाट आधा घण्टामाथि उक्लिएपछि मध्य पहाडी लोकमार्ग भेटिन्छ। अधिकांश स्थानीले सडक सवारी साधनबाटै यात्रा गर्न थाले । सडक यातायातको पहुँच विस्तारका कारण पनि लामिडाँडा विमानस्थलमा उडान नभएको स्थानीय बताउँछन्।

२०२८ सालदेखि सञ्चालनमा आएको लामिडाँडा विमानस्थलमा उडान नहुँदा रावाबेँसी गाउँपालिका, ऐसेलुखर्क गाउँपालिका र केपिलासगढी गाउँपालिका, ओखलढुंगाको कुइभीर र सोलुखुम्बुका केही स्थानका स्थानीय बढी मारमा परेका छन्। 

होटेलमा लाग्यो ताला 

खानीडाँडा विमानस्थल र खोटेहाङ गाउँपालिका–४ बड्कादियालेस्थित थामखर्क विमानस्थल सञ्चालनमा आउनु अगाडि लामिडाँडा विमानस्थल जिल्लाको एक मात्र हवाई यात्राको माध्यम थियो। लामिडाँडामा दैनिक यात्रुको घुइँचो लाग्ने गरेको थियो । होटेल तथा व्यापार व्यवसाय फस्टाउँदो थियो।

होटेलबाट स्थानीय व्यवसायीले राम्रो आम्दानी गर्दैआएका थिए। तर उडान हुन छाडेपछि लामिडाँडाका दर्जनौँ होटेलमा ताला लागेको छ। लामिडाँडा विमानस्थलमा उडान नहुँदा यातायात, पर्यटन, कृषि, स्वास्थ्य लगायतका क्षेत्रमा असर परिरहेको छ।