झरना थापाको लेखन तथा निर्देशनमा उनकी छोरी सुहाना र अनमोल केसीको मुख्य अभिनय अनि सुनिलकुमार थापाको लगानीमा बनेको ‘ए मेरो हजुर–४’को चर्चा नेपाली चलचित्र बजारमा अहिले व्यापक छ । फिल्मी कर्ममा रमाएका झरना र सुनिल दम्पतीको ‘रियल’ लाइफ पनि रिल लाइफझैँ नाटकीय छ । टिनएजको त्यो उमेर, त्यो समय, अनि त्यो प्रेम प्राप्तिका लागि गरेको दौडधूप सम्झँदा सुनिलकुमार नोस्टाल्जिक हुन्छन् । अनि, उनको प्रेमले पुलकित झरना अतीतलाई सम्झँदा यसै हराउँछिन् । उनीहरूलाई लाग्छ, आफ्नै विगत पनि एउटा सुन्दर चलचित्र हो । जहाँ एउटा मीठो कथा छ, कथामा बाँधिएका भिन्न भिन्न पात्र छन् र त्यसकै मुख्य भूमिकामा स्वयम् ती दुई बाँचेका छन् ।
‘हामीलाई हाम्रै प्रेम कहानी कता–कता फिल्मी लाग्छ, आफैमा कथा झैँ लाग्छ’, रोमाञ्चक मुडमा सुनिलकुमार सुनाउँछन्, ‘यही कथालाई मात्र फिल्म बनायो भने पनि सुपरहिट हुन्छ ।’
१७ वर्षको कलिलो उमेरमा २२ वर्षका सुनिलसँग डराउँदै डराउँदै भागेर विवाह गरेकी हुन् झरनाले । त्यो पनि हतार हतार । प्रसङ्गमा सुनिल सुनाउँछिन्, ‘वैशाखमा भेट भएको थियो । असारमा बिहे गर्यौँ । हामीले एक अर्कालाई राम्रोसँग चिन्न पनि राम्रो पाएका थिएनौँ ।’
