सत्तारुढ गठबन्धनलाई परास्त गर्दै रोल्पा उद्योग वाणिज्य संघको अध्यक्षमा केशवकुमार आचार्य निर्वाचित भएका छन्।
संघको ८औं अधिवेशन अन्तर्गत नयाँ नेतृत्व चयनका लागि मंगलबार भएको निर्वाचनमा प्रतिद्वन्द्वी बशन्त सुवेदीलाई ३ मतले पछि पार्दै आचार्य निर्वाचित भएका हुन्।
आचार्य संयुक्त व्यावसायिक प्यानलबाट उम्मेदवार बनेका थिए भने सुवेदी सत्तारुढ गठबन्धनका तर्फबाट उम्मेदवार बनेका थिए। आचार्यले ४ सय ३७ मतका साथ विजयी हासिल गर्दा सुवेदीले ४ सय ३४ मत ल्याएको निर्वाचन अधिकृत तुल्सी जीसीले जानकारी दिए।
अध्यक्षमा निर्वाचित आचार्य पूर्व उपाध्यक्ष हुन भने सुवेदी पूर्व महासचिव तथा यस अघि पनि अध्यक्षमा पराजित उम्मेदवार हुन्। जम्मा १ हजार २ सय १८ जना मतदाता रहेकोमा कुल ९ सय ९५ मत खसेको थियो।
अन्य पदाधिकारीहरु निर्विरोध भएपनि अध्यक्ष र सदस्यका लागि भने मतदान भएको थियो। पदभार ग्रहण र साधारणसभा भने फागुन २७ गते हुने जीसीले बताए।
‘औपचारिक कार्यक्रम गर्ने पुरानै प्रचलन अनुसार पहिले निर्वाचन र पछि वार्षिक साधारण सभा तथा पदभार ग्रहण कार्यक्रम तय भएको छ’ जीसीले भने ‘नेपाल उद्योण वाणिज्य महासंघका प्रतिनिधि र अन्य अतिथिहरु सहितको कार्यक्रम पछि हुने भएको हो।’
वाणिज्यतर्फको उपाध्यक्षमा मिलन रोका, उद्योगतर्फको उपाध्यक्षमा गोपाल प्रसाद श्रेष्ठ, महासचिवमा कमल घर्ती, सचिवमा साजन कुमार थापा र कोषाध्यक्षमा बसन्ता आचार्य निर्विरोध निर्वाचित भएका थिए।
यस्तै ९ जना सदस्यका लागि भएको निर्वाचनमा अशोककुमार आचार्य, इन्द्रबहादुर महरा, ऋषिराम रिजाल, चन्द्रबहादुर बुढा, दीपककुमार श्रेष्ठ, विशेष घर्तीक्षेत्री, रञ्जु पोख्रेल, शिवराज आचार्य र सुरेन्द्र थापा निर्वाचित भएका निर्वाचन समितिले जनाएको छ।
