भूमिगतदेखि खुला राजनीतिमा आउँदासम्म करिब चार दशकदेखि प्रतिस्पर्धा र सहकार्य गर्दै आएका नेकपा एमालेका कतिपय महत्त्वपूर्ण नेताहरूलाई चितवनमा सुरु भएको पार्टीको दशौँ महाधिवेशनमा नदेख्दा तल्लो तहका कार्यकर्ताहरूले दुखमनाउ गरेका छन्।
यसअघिका महाधिवेशनहरूमा हालका अध्यक्ष केपी ओलीसँग प्रतिस्पर्धा गरेका माधवकुमार नेपाल र झालनाथ खनालले अर्को पार्टी गठन गरी सकेका छन् भने अर्का वरिष्ठ नेता वामदेव गौतम पनि एमालेबाट अलग्गिएका छन्।
विसं २०७१ मा काठमाण्डूमा भएको नवौँ महाधिवेशनमा ओलीसँग पराजित भएपछि बिग्रिएको नेपाल र ओलीको सम्बन्ध त्यसपछि कहिल्यै राम्रो हुन सकेन।
नेताहरूबीच सम्बन्ध जेजस्तो कारणले बिग्रे पनि महाधिवेशनमा आएका कार्यकर्ताहरू भने त्यसप्रति दुखी भएको देखियो।
