कोरोना महामारीका कारण जारी लामो समयको लकडाउनमा धेरै बेरोजगार बने। तर, सीता न्यौपानेका लागि भने लकडाउन अवसर पनि बन्यो।
लामो लकडाउन अरूलाई जस्तै सीताको लागि पनि ‘डिप्रेसिङ’ समय थियो। तर, सोही समयमा उनले नयाँ यात्रा सुरु गरिन्। “पहिलो लकडाउनमा मैले आफूलाई चिन्ने मौका पाएँ। एकदम डिप्रेसिङ मोमेन्ट थियो। लाइफमा केही पनि भइरहेको थिएन। यही समयमा अब लाइफलाई कसरी अगाडि लैजाने भन्ने सोच्ने क्रममा आफ्नो सानैदेखिको खुबीलाई बुझेँ, आफ्नो क्षमतालाई चिने र अघि बढेँ,” उनले आफ्नो स्ट्यान्ड अप कमेडियनको यात्राको सुरुवात सुनाइन्।
