दसैं आयो भन्दा भन्दै, दशा ल्यायो
दसैं आयो भन्दा भन्दै, दशा ल्यायो
सररर रोटेपिङैमा
अझै छन् बरिलै साहुको ऋणमा
दसैंको माहोल छ। दसैं आउँदा हुने खानेहरु रमाइलो गरिरहेका हुन्छन्। तर गरिब परिवारलाई भने एक छाक टार्नसमेत गाह्रो हुन्छ। बाढिपहिरोले खेतिपाती नष्ट गर्दाको पीडा। जसमाथि थपिने साहुको ऋण। जसकारण त्यो गरिब परिवारको सदस्यले दसैंलाई दशा भनि सोच्छ। दसैं आउँदा उसलाई झन दुखी बनाउछ। तर अन्त्यमा त्यो गरिबले जे छ त्यसैमा खुसी हुने कोसिस गर्छ। किनकी उसँग अरु विकल्प नै हुँदैन। दसैंमा ठुलाबडाबाट टीका लगाउन पाउँदाको खुसी र आर्शीवाद नै ठुलो हो भन्ने सोच्छ। अनि आफूसँग जे छ त्यसैमा रमाउछ पनि। जुन कथा हो दसैंविशेष गीत 'दसैं आयो भन्दा भन्दै दशा ल्यायो' को।
यो 'दसैं' बोलको गीत 'निर्वाण म्युजिक ब्यान्ड एण्ड लिंक' को हो। करिब १२ वर्षअघिको यस गीतले दसैंको छेकोमा एक गरिब परिवारको सोच्ने पीडा बोकेको छ। यो गीतको शब्द लेखेका हुन् गायक प्रमोद निर्वाणले। साथै गीतमा स्वर र संगीत समेत प्रमोदको नै छ।
विसं २०६६ साल ताका। 'निर्वाण म्युजिक ब्यान्ड एण्ड लिंक' ब्यान्ड चर्चाको उचाईमा थियो। किनकी ब्यान्डबाट 'किन यसरी' र 'जब तारा गनेर' गीतहरु आइसकेका थिए। जुन गीतहरु निकै हिट थिए।
बालुवाटारस्थित घरमा प्रमोद आराम गरिरहेका थिए। मोटरसाइकल दुर्घटनामा परेर उनको खुट्टा भाँचिएको रहेछ। जसकारण पाएको खाली समय। अब यो खाली समयमा के गर्ने होला भनि सोच्न थालेछन् उनी। एकदिन उनको दिमागमा दसैं शब्द फुरेछ। दसैं के रहेछ भनेर उनी सोच्न थालेछन्। निष्कर्षमा पैसा हुँदा पो दसैं हो, पैसा नहुँदा दशा हो लागेछ। उनले त्यो भावलाई कोर्न थाले। अनि बन्यो 'दसैं आयो भन्दा भन्दै दशा ल्यायो' गीत।
