कलममा थुनिएका योजना
कापीमा पोखिएका इच्छा
झोलामा झुन्डिएका सपना
आज
हजारौँ दिनपछि जागेर
प्रश्न उठाउँदैछन्।
म विक्षुप्त भौतारिदै
जवाफको खोजीमा छु।
खस्रा रातमा सङ्लो मनले
कल्पना गरेका किशोर सपना
साकार हुन सकेनन्।
आकाश छुन नपाउँदै
पखेटा काटिए।
पराइघर उपेक्षा गर्न पढिएको पुस्तकले
झन् पराइघरतिर घचेट्यो।
आफ्ना नजिकिँदा मलाई
झन् पराइतिर धकेल्यो।
र त,
सुकेको पसिना
लुकेको डर
झुकेको शिर
फुटेको कर्म
टुटेको साथ
मेरो जीवनको मन्त्र बने।
