सेप्टेम्बरको दोस्रो साता अचानकजस्तै आएको एउटा समाचारले पश्चिमा देशमा खैलाबैला मच्चियो। अफगानिस्तानमा अमेरिकाको हठात् फिर्तीले निम्त्याइरहेका परिणामको लेखाजोखा चलिरहेकै बेला अमेरिका, बेलायत र अस्ट्रेलियाको छुट्टै त्रिदेशी रणनीतिक गठबन्धन (जसको नामाकरण ‘अउकस’ भनी गरियो) को घोषणा त्यतिबेला चर्चाको चुलीमा पुग्यो, जब फ्रान्सले त्यो गठबन्धनलाई ‘पछाडिबाट छुरा प्रहार’को संज्ञा दियो।
अनि अस्ट्रेलिया र अमेरिकाबाट यसअघि कहिल्यै नभएसरी फ्रान्सले आफ्ना राजदूत फिर्ता बोलायो। सेप्टेम्बर १५ मा सार्वजनिक तीन देशबीचको सुरक्षा सम्झौताप्रति फ्रान्स यसरी आक्रोशित बन्नुको कारण भने सन् २०१६ मा पेरिस–क्यानबरा सरकारबीच भएको पन्डुबी खरिद सम्झौताको खारेजी थियो।
सन् २०१६ मा फ्रान्सबाट १२ वटा हाल चलनचल्तीमा रहेको प्रविधिमा आधारित (कन्भेन्सनल) पन्डुबी अस्ट्रेलियाले खरिद गर्ने सम्झौता गरेको थियो। तर, अउकस गठबन्धनको घोषणासँगै अस्ट्रेलियाले सो सम्झौता तोड्ने निर्णय गर्यो र त्यसको सट्टा उसले अमेरिकाबाट आणविक ऊर्जामा आधारित पन्डुबी पाउने भएको छ।
