नेकपा एमालेका महासचिव ईश्वर पोखरेलले एमाले एक–ढिक्का बनाउन गरिएको लचकतालाई कुल्चेर माधव नेपालले अदृश्य शक्तिहरूको चाहना पूरा गर्न पार्टी फुटाएकाे आराेप लगाएका छन्।
महासचिव पोखरेलले सामाजिक सञ्जालमार्फत् पार्टीभित्रको एकतालाई कायम राख्न नेता नेपालसँग पटकपटक अपील गरेकाे समेत स्पष्ट पारेका हुन्। कम्युनिस्ट आन्दोलन र मुलुकको लोकतान्त्रिक राजनीतिक आन्दोलनमा माधव नेपालबाट घृणित र निन्दनीय कार्य भएको उनकाे भनाइ छ।
एमाले मुलुकमा आर्थिक विकास, सम्वृद्धि, राष्ट्रिय स्वाभिमान, स्वतन्त्रता र समाजमा अराकताको अन्त्यकाे उद्देश्य बोकेर अघि बढिरहेको पोखरेलले बताए। उनले भने, 'माधव नेपाललगायत केही साथीहरूसँग यसबीच म आफैले पनि पटकपटक कुराकानी गरेको छु, छलफल गरेको छु। तर ती सबै निर्रथक बने।'
'भित्री–बाहिरी सबै किसिमका प्रतिकूलताहरूसित जुद्धै यसले आफूलाई यिनै उद्देश्यमा अगाडि बढाउँदै आएको छ,' उनले भनेका छन्, 'यो नेपाली जनताबाट पटकपटक अनुमोदित भएको राजनीतिक पार्टी हो। त्यसैले यो गतिशील पार्टीबाट कोही बाहिरिँदैमा एमालेलाई समाप्त पार्ने योजना सफल हुनेछैन।'
यस्ताे छ महासचिव ईश्वर पोखरेकाे अपील
हाम्रो गौरवशाली पार्टी - नेकपा ( एमाले) को आन्तरिक जीवनमा मात्र नभई नेपालको कम्युनिस्ट आन्दोलन तथा मुलुकको लोकतान्त्रिक राजनीतिक आन्दोलनमा आज केही व्यक्तिहरूबाट कालो धब्वा लगाउने घृणित र निन्दनीय काम भएको छ। दु:खका साथ भन्नुपर्दैछ - यो काम पार्टीमा लामो समय पार्टी प्रमुख भएर बस्नुभएका नेता माधव नेपालको अगुवाइमा भएको छ!! पार्टीलाई एकतावद्ध बनाएर अगाडि बढाउन यसविच पार्टी अध्यक्ष लगायत विभिन्न साथीहरूले गर्नुभएको अनगिन्ती प्रयासका बाबजुद आज एमालेको एकतावद्ध अवस्थामा प्रश्न उठाउने काम भएको छ।
यसविच पार्टीभित्रको एकतालाई कायम राख्न पटक पटक अपिल गरिएको छ। माधव नेपाल लगायत केही साथीहरू संग यसविच म आफैले पनि पटक पटक कुराकानी गरेको छु - छलफल गरेकोछु। तर ती सबै निर्रथक बने! नेकपा (एमाले)का नेता, कार्यकर्ता, शुभेच्छुकहरूको चाहना अनुसार पार्टीलाई एकढिक्का बनाउन यस विचमा बनाइएका समझदारी र प्रस्तुत गरिएको लचकतालाई समेत कुल्चेर अदृश्य शक्तिहरूको कुत्सित चाहना पुरा गर्ने काम गरिएको छ।
नेकपा (एमाले) मुलुकमा आर्थिक विकास र सम्वृद्धि, राष्ट्रिय स्वाभिमान र स्वतन्त्रता , समाजमा अराकताको अन्त्य आदि उद्देश्य बोकेर अघि बढिरहेको पार्टी हो। भित्री बाहिरी सबै किसिमका प्रतिकूलताहरूसित जुद्धै यसले आफूलाई यिनै उद्देश्यमा अगाडि बढाउँदै आएको छ। यो नेपाली जनताबाट पटक पटक अनुमोदित भएको राजनीतिक पार्टी हो। त्यसैले यो गतिशील पार्टीबाट कोही बाहिरिदैमा एमालेलाई समाप्त पार्ने योजना सफल हुनेछैन। फुटको विगत हामी सबैले देखेका- भोगेका हुनाले केही मानिसहरू कुण्ठा तथा बदलाको भावना बोकेर बाहिरिदैमा धैर्यता नगुमाउन देश तथा प्रवासमा रहेका नेकपा (एमाले) का सम्पूर्ण नेता , कार्यकर्ता र शुभेच्छुकहरूलाई हार्दिक अपिल गर्दछु। नेकपा (एमाले) पार्टी तथा आन्दोलनलाई अगाडि बढाउन संकल्पवद्ध छ, दृढताका साथ अघि बढिरहनेछ!!
.jpg)
