डा. प्रवीण श्रेष्ठ
कोरोना प्यान्डेमिक कालमा दक्षिण एसियाको भूमिका कस्तो रह्यो भन्ने कुरा सर्वबिदितै छ। कोरोना प्यान्डेमिक सुरु भएदेखि हालसम्म दक्षिण एसियामा मात्रै विश्वको करिब १७% कोरोना संक्रमण भेटिइसकेको छ भने विश्वको करिब १३% कोरोना मृत्यु दक्षिण एसियामै देखिएको छ।
करिब दुई अरब जनसंख्या भएको यस क्षेत्रले विश्वको करिब एक चौथाई जनसंख्या ओगटेको परिप्रेक्षमा हालसम्मको यस क्षेत्रको कोरोना संक्रमण र कोरोना मृत्युको अनुपात त्यति ठूलो नभएता पनि सामाजिक तथा आर्थिक रुपमा पिछडिएको हाम्रो समाजमा कोरोना प्यान्डेमिकले कति नोक्सान पुर्यायाे होला अनुमान लगाउन त्यति गार्हाे नपर्ला।
चित्र न. १ ले दक्षिण एसियाको विगत एक महिनाको कुल कोरोना संक्रमण र मृत्युको प्रवृत्ति देखाएको छ। समग्र दक्षिण एसियाको तथ्यांक हेर्ने हो भने भारत ठूलो राष्ट्र भएको हुनाले र त्यहाँको कोरोना तथ्यांक अन्यत्रको भन्दा धेरै हुने भएकोले दक्षिण एसियाको तथ्यांकलाई प्राय भारतले नै प्रतिनिधित्व गरेको हुन्छ। तर पछिल्लो समय हेर्ने हो भने भारतको तुलनामा बंगलादेश, पाकिस्तान, श्रीलंका र नेपालमा दैनिक संक्रमण निकै बढेको हुनाले हाल दक्षिण एसियाको प्यान्डेमिक मानचित्रमा भारतको प्रभाव केही घटेको देखिन्छ।
