डीएसपी गजुसिद्ध बज्राचार्यले फोनबाट अभियुक्तको हुनसक्ने सम्भावना बताएपछि योगेश बाराको कलैयातिर तर्फ 'मुभ' भए।
हराएको केही दिनपछि त्यहाँ १५ वर्षीय किशोरको शव भेटिएको थियो। प्रहरीको अनुसन्धानले हत्या भएको निष्कर्ष निकालेको थियो। तर कसले गर्यो हत्या?
किशोर हराएदेखि नै गाउँमा हल्लाखल्ला भइरहेको थियो। अन्तिम पटक उनलाई देख्ने को थिए? खोजी शुरु भयो। नभन्दै अन्तिम पटक उनलाई एक १४ वर्षीय बालकले देखेका रहेछन्। देखेका मात्र होइन सँगै बाँधमा खेल्नसमेत गएको खुल्यो।
बाँधमा खेल्दा एक जना मानिसलाई उनले भेटेको र कुराकानीसमेत गरेको बताएपछि प्रहरी त्यही व्यक्तिको खोजीमा लाग्यो। हराएका किशोरले अर्का बालकलाई आफू घर जाने र एक छिनमा फर्किने बताएका थिए। तर, ती बालकलाई थाहा थिएन - ऊसँग गफ गरिरहेको मानिस को हो? किनकि ती व्यक्ति गाउँका थिएनन्।
अनुसन्धानमा जुटेको प्रहरीसामु एउटा 'क्लु' त्यही मानिस हुँदै थियो। बाँधमा बालकले जसलाई देखेका थिए, तिनको खोजी थाल्यो प्रहरीले। देख्ने बालकले उसको हुलिया याद भएको बताएपछि प्रहरीले काठमाडौँबाट प्रहरी नायव निरीक्षक (सई) योगेश महर्जनलाई झिकाएको थियो।
योगेश महर्जन - नेपाल प्रहरीका एक अनुभवी आर्टिस्ट। अर्थात्, अपराधीको अनुहार दुरुस्तै उतार्ने आर्टिस्ट।
