गत वैशाख ११ गते प्रधानमन्त्री केपी शर्मा ओलीले तामझामका साथ २०७२ सालको भूकम्पपछि पुनःनिर्माण गरिएको धरहरा उद्घाटन गरे।
सामान्यातया काम पूरा भएपछि मात्र कुनै पनि कुराको उद्घाटन गरिन्छ। तर प्रधानमन्त्री ओलीले उद्घाटन गरेको दिन धरहराको टावर (स्तम्भ) को काम मात्रै सकिएको थियो। धरहरा चढ्न आवश्यक भौतिक पूर्वाधार अझै अधुरै छन्। पहिलेझैं काठमाडौं उपत्यका नियाल्नेगरी धरहरा चढ्न कम्तीमा पुससम्म कुर्नपर्छ।
राष्ट्रिय पुनर्निर्माण प्राधिकरणका पूर्वाधार–विज्ञ राजुमान मानन्धरका अनुसार उद्घाटनका बेला मुख्य स्तम्भको काम लगभग सकिए पनि पार्किङ, म्युजिमय, दुईमध्ये एउटा लिफ्ट, कतिपय विद्युतीय काम बाँकी नै थिए। वैशाखमै उद्घाटन गरिए पनि पुसमा मात्रै धरहरा निर्माण पूरा हुने प्राविधिक बताउँछन्।
