ढुंगा, गिट्टी, बालुवाको पहाडलाई नै हामी चुरे भन्छौं । चुरे भनेपछि यिनै प्राकृतिक सम्पदाको पर्यायका रूपमा सम्झिन्छौं । चुरेको भूगोलमा पहिले घना वन, वन्यजन्तु, चराचुरुङ्गी, हरियो-भरिलो, जलाशय, माछा, सिमसार र जमीन उर्बर थियो । अब त यो सबै ‘थियो’ को कुरामा बदलिन थाल्यो । त्यो पनि मेरो आफ्नै जीवनकालभित्रै ।
यो क्षेत्रमा जैविक विविधता र वनजंगल अहिले न्यून मात्रामा छ । अब त अवशेष मात्रै छन् । नाङ्गो-नाङ्गो हुन थालेको जुन चुरे छ, त्यही चुरेको करङमा डोजर, क्रसर, ट्रक र ट्याक्टरहरू सल्बलाएका छन् । चुरेको ढुंगा, गिट्टी, बालुवा दोहन गरेका समाचार, रिपोर्ट र टिप्पणी छरपस्ट हुन थालेको देखेर चिन्ता लागेको छ ।
