गोविन्द मरासिनी
विश्वभर महामारीका रूपमा फैलिएको कोभिड–१९ को दोस्रो लहरका कारण यतिबेला हामी पनि आक्रान्त छौँ। पछिल्लो समय हामीकहाँ दैनिक सयभन्दा बढीले ज्यान गुमाउन बाध्य छन्। दैनिक पाँच–सात हजारसम्म संक्रमित थपिए। सुखद खबर, पछिल्ला दिनमा निको हुनेको संख्या बढ्दो छ। कोरोना संक्रमणको जोखिमबाट जोगिन देशभर निषेधाज्ञा जारी नै छ। यसमा नागरिकको तहबाट पनि सचेतना, सजगता अपनाउन जरुरी छ।
अहिलेसम्म हामीकहाँ ७ हजारभन्दा बढीले ज्यान गुमाइसकेका छन्। अझै पनि कतिपय संक्रमितले अस्पतालमा आइसियु बेड, अक्सिजन पाउन सकिरहेका छैनन्।
दोस्रो लहरको तुलनामा गत वर्ष हामीकहाँ कोरोनाले त्यति मानवीय क्षति नपुर्याए पनि समग्र अर्थतन्त्र प्रभावित भएको थियो। गत वर्षबाट पाठ सिकेर सरकारले केही सावधानी अपनाएको भए सायद यति धेरै जनताले अकालमा ज्यान गुमाउनुपर्दैनथ्यो। तर, सरकारले जनताको स्वास्थ्य सुरक्षामा त्यति संवेदनशील हुन सकेन, बरु सरकार जोगाउन संविधान मिच्नेसम्मका काम भए। भ्रष्टाचारका अनेक तौरतरिका पनि बाहिरिए।
आज हामीले कोरोनाबाट जुन क्षति व्यहोरिरहेका छौँ, नागरिकले प्रभावकारी उपचार पाउन नसकिरहेको जुन अवस्था छ, यसमा सरकारलाई तयारी गर्ने प्रशस्त समय थियो, तर गत वर्षको अवस्था र अन्य देशलाई हेरेर सरकारले तयारी गर्न सकेन।
