कोरोनाबाट आम मानिसलाई कसरी बचाउने भन्ने चिन्ता चिन्तन सबैतिरबाट भइरहेको छ। दिनदिनै संक्रमण बढेको छ र दिनको सरदर २०० भन्दा बढीको मृत्यु भइरहेको छ। यसको अर्थ हो तत्कालको अवस्थाको व्याख्या गर्दा हामी अनियन्त्रणीय अवस्थामा छौँ।
मात्र २ करोड ६४ लाख जनसंख्या भएको देशमा दिनमा लगभग साढे नौ हजार जनता संक्रमित भइरहेका छन्। बेलामा अस्पतालको बेड नपाइनु, अक्सिजनको अभाव हुनु, आवश्यकताअनुसार बिमारीलाई भेन्टिलेटरमा राख्न नपाउनु अनियन्त्रणीय अवस्था हो।
यस्तो समयमा सरकारले निषेधाज्ञाको माध्यमबाट संक्रमणको श्रृङ्खला टुटाउने प्रयास गरिरहेको छ। यसैका लागि प्रहरीहरू दिन रात नभनेर सडकमा खटेर अनावश्यक आवागमन नियन्त्रण गरिरहेका छन्। तैपनि संक्रमण करिब-करिब उस्तै स्थितिमा भइरहेको छ। यसरी कोरोना मुक्तिको अवस्थामा पुग्न सकिएला? अहिलेसम्म त्यसको कुनै अनुमान लगाउन सकिने अवस्था छैन।
