1619516572.jpg)
भारतको लुदियानाबाट आएका कैलालीको वनबेहडाका १८ वर्षीय एक युवाको नाकामा एन्टिजेन परीक्षण गर्दा कोरोना पोजेटिभ आयो।
रिपोर्ट पोजेटिभ आएपछि उनलाई स्वास्थ्यकर्मीले नाकामै त्रिपाल टाँगेर बनाइएको छहारीमा बस्न भने।
प्रहरीले उनलाई अरू मानिसहरूको सम्पर्कमा जान दिएका छैनन्।
‘मैले हिजोदेखि खाना खाएको छैन, पानी पनि पिउन पाएको छैन,’ उनले भने।
कक्षा १२ पढ्ने उनी कम्प्युटर सिक्न चाहन्थे। पैसा नभएर कम्प्युटर कक्षा जान नपाएपछि स्कुल बिदा भएकाले महिनादिनअघि कमाउन भारत गएका थिए।
भारतमा होटलमा काम गरे। कोरोनाले होटल बन्द भएपछि नोकरी छुट्यो।
‘उता कोरोनाले काम बन्द भएपछि तब घर आएको हो,’ उनले भने।
उनीसँगै ८/९ जना अरू पनि सँगै आए। उनीहरूमध्ये २ जनाको मात्र परीक्षण भयो। दुवै जनाको कोरोना परीक्षण रिपोर्ट पोजेटिभ आयो। उनीसँगै आएका साथीहरू घर गए।
