पूर्वी चितवनको राप्ती नगरपालिका–११ मा मजदूर बोकेको ट्रयाक्टरदुर्घटना हुँदा मृत्यु हुनेको सङ्ख्या ६ पुगेको छ।
जिल्ला प्रहरी कार्यालय चितवनका अनुसार आज बिहान उपचारका क्रममा थप एक जनाको मृत्यु भएको हो।
मृत्यु हुनेमा राप्ती नगरपालिका–४ का ४५ वर्षीय सूर्यबहादुर श्रेष्ठ रहेका छन् । उनको उपचारका क्रममा पुरानो मेडिकल कलेजमा मृत्यु भएको कार्यालयका प्रवक्ता सूर्यबहादुर थापाले जानकारी दिए।
आइतबार साँझ भएको ट्रयाक्टरदुर्घटनामा पाँच जनाको मृत्यु भएको थियो।
मृत्यु हुनेमा राप्ती नगरपालिका–५ का ३५ वर्षीय खड्क लामा, खैरहनी नगरपालिका–९ का ४० वर्षीय मगन महतो, ५० वर्षीया छनिया महतो र राप्ती नगरपालिका–४ का ४५ वर्षीय सीताराम श्रेष्ठ रहेका छन्।
एक जना अन्दाजी २५ वर्षीय पुरुषको नाम थर ठेगना खुल्न सकेको छैन। थाकलटारबाट चिउँडेखोला तर्फ आउँदै गरेको ना१ त ६२८२ नं को ट्रयाक्टरअनियन्त्रित भई आम पानीस्थित चिउँडे खोलामा दुर्घटना भएको थियो। ट्रयाक्टरसडकबाट करीब २०० मिटर तल खस्दा सवार १८ जना घाइते भएका छन्।
घाइतेमध्ये छ जनाको अवस्था गम्भीर रहेको छ भने १० जनाको अवस्था मध्यम रहेको छ। एक जनाको अवस्था सामान्य छ। घाइते सबैको पुरानो मेडिकल कलेजमा उपचार भइरहेको छ। रासस
