जनक नेपाल
प्रधानमन्त्री एवं पार्टी अध्यक्ष केपी ओलीविरुद्ध अर्का अध्यक्ष पुष्पकमल दाहाल 'प्रचण्ड'ले पेस गरेको राजनीतिक प्रस्ताव सचिवालयमै रोकिएको भए सम्भवतः नेकपा विभाजित हुने थिएन । त्यो रोक्ने सामर्थ्य कसैसँग थियो भने त्यो उपाध्यक्ष बामदेव गौतमसँग थियो । कारण, उनको साथले ओली सचिवालयमा बहुमतमा पुग्थे र प्रस्ताव फिर्ता गराउँथे ।
ओलीलाई एमाले नेतृत्वमा पुर्याउन निर्णायक भूमिका खेलेका गौतमकै कारण ओली तत्कालीन नेकपामा अल्पमतमा परे । अन्ततः त्यो प्रतिनिधिसभा विघटन र पार्टी विभाजनको कारण बन्न पुग्यो ।
एमालेको आठौँ महाधिवेशनमा ओलीलाई पराजित गर्दै झलनाथ खनाल पार्टी अध्यक्ष बनेका थिए । तर, २०७० को संविधानसभा निर्वाचनपछि पार्टी संसदीय दलको नेतामा भने ओलीले उनै खनाललाई हराइदिए । एक वर्षपछि २०७१ असारमा भएको नवौँ महाधिवेशनमा पार्टीमा १५ वर्ष नेतृत्व सम्हालेका माधव नेपाललाई पराजित गर्दै ओली अध्यक्ष बन्न पुगे । ओलीका यी दुवै जितमा नेता गौतमको निर्णायक साथ थियो ।
तर, नेकपा विवादको उत्कर्षमा ओलीले उनै गौतमको साथ पाएनन् ।
भैँसेपाटीस्थित गौतम निवासमै बनेको थियो, ओलीविरुद्ध प्रचण्ड-माधव नेपाल समूहको मोर्चा । नौ सदस्यीय सचिवालयका पाँच सदस्य एकातर्फ उभिएपछि ओलीको प्रधानमन्त्री र पार्टी अध्यक्ष पद बारम्बार हल्लिएको थियो । तर, जबजब ओली सत्ता संकट उत्कर्षमा पुग्थ्यो, संकटमोचनमा उनै गौतम जहिल्यै सहयोगी बनेर उभिन्थे ।
