मानिसले सोचेको जब पूरा हुन्छ नि तब सारा संसार नै उसकै पक्षमा छ जस्तो अनुभव गर्छ । त्यसपछि आउन थाल्छ हिम्मत, आत्मविश्वास र खुसी । अनि आउँछ नयाँ उत्साहका साथ काम गर्ने जाँगर पनि । बैङ्किङ इतिहासमा पहिलो महिला डेपुटी गभर्नर बनेर इतिहासमा नाम लेखाउन सफल भएकी डा. निलम ढुङ्गानालाई पनि अहिले त्यस्तै सोच आउन थालेको उनका अभिव्यक्तिबाट बुझ्न कठिन छैन । उनमा छुट्टै खालको उत्साह र खुसी देखिन्छ ।
जब उनी राष्ट्र बैङ्कमा तेस्रो नम्बरकी कार्यकारी निर्देशक भइन् त्यतिबेलादेखि नै आफूलाई डेपुटी गभर्नरको दाबेदार सोच्न थालिसकेकी थिइन् । समावेशी बनाउनका लागि पनि यस पटक सरकारले आफूलाई चयन गर्छ भन्नेमा उनी विश्वस्त भइन् । आखिर हुन पनि उनले सोचेजस्तै भयो । मन्त्रिपरिषद्को बैठकले गरेको निर्णय सार्वजनिक नहुँदै उनी विभिन्न सञ्चार माध्यममा छाइन्– नेपालकी पहिलो महिला डेपुटी गभर्नर बनेर ।
हुन त उनीसँगै बमबहादुर मिश्र पनि डेपुटी गभर्नरमा छनोट भएका थिए तर उनीभन्दा बढी ढुङ्गाना चर्चाको पात्र बनिन् । कारण उनले रचेको इतिहास नै थियो । राष्ट्र बैङ्कको इतिहासमा अहिलेसम्म त्यो तहसम्म कुनै महिला पुगेकै थिएनन् ।
