मेरा आँसुहरूले
लेखेको संविधान भित्र
रगतको खोला बगेको छ
मैले न्यायको भिख मागेर
आफ्नो प्राणसंगै
जिन्दगीको महँगो उपहार
यही देशलाई दिएको छु

भोलिको मलामी र 
आजको जन्तीलाई
म विश्वास गरौँ कसरी
बल्दो अग्नीममा 
प्राणको आहुती हालेर
शान्तीको कामना खोज्ने
त्यो न्यायालय 
आज अन्धो भएको छ

मेरा सन्ततिहरू
लुला र लङ्गडा भएको 
कयौँ वर्ष भइसक्यो
आफ्नो वक्षस्थलमा
बन्दुकको खोली राखेर
न्यायको भिख माग्न
आन्दोलनको आवाज उठाएका हुन्

आज लोचनमा पट्टि बाँधेको
त्यो काँतर मेरो सैनिक
भागेको छ धेरै टाढा
तड्पिएर बाँच्न
जिन्दगीको मरूभूमिमा

हाम्रो समय आयो अब
हर्षका आँसुहरूले
विजयको झन्डा फर्फराएर
पहाड र तराईका 
ती पाषाणहरूमा 
लेखि दिनु छ केही
वीरगति प्राप्त गरेका
वीर व्यक्तित्वहरूको नाम