नेकपा स्थायी कमिटी सदस्य तथा लुम्बिनी प्रदेशका मुख्यमन्त्री शंकर पोखरेलले विभाजित नेकपा अध्यक्ष प्रचण्डको आगामी चुनाव लड्ने ठाउँ नभएको बताएका छन्।
रोल्पाको लिबाङमा शनिबार नेकपा ओली पक्षद्धारा आयोजित जनवर्गीय भेलालाई सम्बोधन गर्दै नेता पोखरेलले प्रचण्ड डुलुवा नेता भएको आरोप लगाए।
पहिलो संविधानसभाको निर्वाचनमा रोल्पाबाट निर्वाचित भएका प्रचण्डले दोस्रो संविधानसभा निर्वाचनमा रोल्पा छाडेर सिरहा पुगेको बताउदै, नेता पोखरेल भन्छन्, ‘ओलीको काँधमा चढेर चितवनबाट निर्वाचित हुनुभयो। अब आउने चुनावमा प्रचण्ड जहाँबाट चुनाव लडेपनि हार्ने पक्का छ।’
माओवादी आन्दोलनमा साथ दिएका नेताहरुले प्रचण्डलाई छाड्दै गएकाले आगामी राजनीतिक भविष्य अन्यौल रहेको बताए।
नेता पोखरेलले नेकपा महासचिव नेत्रविक्रम चन्द ‘विप्लव’लाई खुला राजनीतिमा आउन आग्रह गरेका छन्।
