पोखरा लाहुरेहरूको शहर हो । त्यसमा पनि अधिकांश गुरुङ समुदाय लाहुरे छन् । तर गुरुङको छोरो उनी भने लाहुरे भएनन्, मोडल बने ।
केही समय र्याम्प उत्रे । पेशामा चित्त नबुझेपछि विदेश मोह जाग्यो । केही वर्ष दुःख भोगे ।
पछि स्वदेशमै सम्भावना देखेर पुनः फर्किए । व्यवसाय थाले । सानो लगानीबाट शुरू व्यवसायले उनलाई केही वर्षभित्रै भरपुर सन्तुष्टि दियो । किताबीभन्दा व्यावहारिक ज्ञान बढी सिकेका उनी भन्छन्, ‘यही विदेश छ । सम्भावनाको ढोका खोज्नुपर्दो रहेछ । युवा वर्ग सकेसम्म विदेशिनु हुँदैन ।’
सिद्धार्थ राजमार्गअन्तर्गत पोखरा–१७ हिमालीटोलमा १ दशकअघि फ्रेस हाउस चलाउने क्रममा ईश्वर गुरुङ (प्रयासी) लाई एक युवतीले जिज्ञासा राखिन्, ‘तपाईं मोडल हैन र ?’
त्यसबेला ईश्वरले आफ्नो परिचय लुकाउँदै ‘हैन’ भने ।
भर्खरै विदेशबाट फर्किएका उनले कान्छा बुवाको प्रेरणाले पुइमे फ्रेस हाउस एण्ड सप्लायर्स चलाएका थिए । हेर्दा आकर्षक र बलिष्ठ ज्यानका ईश्वर भने वास्तविक मोडल नै थिए ।
द लुक्स होमले सन् २००१ मा पोखरामा आयोजना गरेको फेस टू फेस कन्टेस्टका उनी विजेता हुन् । विजेता हुँदै उनी मिस्टर पोखरा घोषित भए । केही समय पोखरा र काठमाडौंमा गरी म्यूजिक भिडियो साथसाथै र्याम्पमा उत्रिएका ईश्वरले विभिन्न इभेन्ट पनि सञ्चालन गरे ।
पोखरामा शुरूआतमा चलेका मोडलको नाम लिनुपर्दा उनको नाम अग्रपंक्तिमा आउँछ । त्यसबेला केही वर्ष बिताएपछि उनमा विदेशको मोह जाग्यो । विदेश पनि गए । जापान, दुबई र मकाउमा गरी ४ वर्ष बिताएका उनी स्वदेशमै केही गर्छु भनी फर्किएर व्यवसाय थालेका थिए ।
.png)
