विभाजनअघि बैठक बस्नै 'सकस' पर्ने सत्तारूढ नेकपा विभाजनपछि दुवै पक्षले धमाधम कार्यकर्ता भेला गर्न थालेका छन् ।
पार्टी कामका लागि बालुवाटारबाट बाहिर ननिस्कने प्रधानमन्त्रीसमेत रहेका अध्यक्ष केपी शर्मा ओली अहिले कार्यकर्ता भेलामा कहिले निजी पार्टी प्यालेस त कहिले प्रज्ञा प्रतिष्ठान धाउन थालेका छन् । केही दिनमा कर्णाली र सुदूरपश्चिम प्रदेश पनि पुग्ने उनको तयारी छ ।
ओलीविरुद्ध मोर्चाबन्दी र पार्टीको आन्तरिक कलहमा व्यस्त रहने प्रचण्ड-माधव नेपाल पक्ष पनि अहिले सडकदेखि जनताको घरदैलोमा पुगिरहेको छ ।
गत साल माघ १९ गते सम्पन्न तत्कालीन एकीकृत नेकपाको केन्द्रीय कमिटी बैठकले केही दिनमा पार्टी एकीकरण प्रक्रिया टुंग्याएर देशैभर जनतासँग जोडिन अभियान शुरू गर्ने निर्णय गरेको थियो ।
