नेपाली काँग्रेसले प्रधानमन्त्री केपी शर्मा ओली र राष्ट्रपति विद्यादेवी भण्डारीको प्रतिनिधिसभा विघटनको प्रकरणलाई गैर संवैधानिक ठहर्यायो। त्यसको विरोध पनि गर्यो। तर, जसै काँग्रेस केन्द्रीय समिति बैठक सुरु भयो निर्वाचनको पक्षमा आवाजहरु आउन थाले। संसद विघटन हुनुपूर्व प्रधानमन्त्री ओलीसँग बारम्बार भेट गरेका थिए काँग्रेस सभापति शेरबहादुर देउवाले। देउवामाथि ओलीको सहयोगी भएको आरो पनि छ। संसद विघटन गरेर मध्यावधि निर्वाचनको घोषणा पनि भइसकेको छ। सडकमा आन्दोलन गर्दै ओलीको राजीनामा मागिरहेका छन्, काँग्रेसका नेता तथा कार्यकर्ता। त्यहीँ पृष्ठभूमिमा काँग्रेसभित्र निर्वाचनमा जानुपर्ने तर्क गर्नेहरु पनि बढेका छन्। केन्द्रीय सदस्य एनपी साउद पनि तिनैमध्येका एक हुन् जसले नयाँ जनादेशको पक्षमा वकालत गरिरहेको छ। पछिल्लो राजनीतिक कदम र काँग्रेसको भावी रणनीतिबारे साउदसँग पहिलोपोस्टले गरेको कुराकानीको अंश:
प्रधानमन्त्रीले चालेको पछिल्लो कदमलाई काँग्रेसले कसरी लिएको छ?
यो असंवैधानिक र अलोकतान्त्रिक कदम हो। नेकपाको दुई तिहाइ असफल भएको प्रमाण हो। अब नेकपाबाट देश उभो लाग्दैन र ताजा जनादेशमा जानुपर्छ भन्ने सन्देशका रुपमा कांग्रेसले बुझेको छ। यो कदमले राजनीतिक अन्यौलता र स्थिरताको खतरा बढ्यो। दुई तिहाइले पनि स्थिरता र समृद्धि दिन सक्ने रहेनछ भन्ने पुष्टि भयो।
काँग्रेस केन्द्रीय कार्यसमिति बैठक चलिरहेको छ, तपाईले के धारणा राख्नुभयो?
मैले हिजो बैठकको सुरुवातमा बोलेँ। यो कदम असंवैधानिक र अलोकतान्त्रिक भए पनि सम्मानित अदालतको निर्णयलाई आत्मसात गर्दै अगाडि बढ्नुपर्छ। काँग्रेस लोकतान्त्रिक पार्टी भएकाले आत्मसात गर्नुको विकल्प छैन। अदालतमा विचाराधिन विषय भएकाले लोकतान्त्रिक पार्टीले आन्दोलन गर्नु उचित हुँदैन। जे निर्णय आउँछ त्यसलाई आत्मसात गरेर चुनावमा जानुपर्छ। सिंगो पार्टीपङ्क्ति चुनावमा लाग्नुपर्छ भन्ने कुरा राखेँ।
