सहयोग रञ्जित

करिब २ वर्षअघि ललितपुरको पिन्छेंका भक्त डंगोलले एउटा कुकुर एडप्ट गरे। नाम राखे – बुल सिंह। डंगोलको जीवनमा बुल सिंह आएपछि उनको परिचय नै फेरियो। उनको परिवारमा बुल सिंह चाँडै घुलमिल भए। आफू जहाँ जान्थे बुल सिंहलाई पनि सँगै लग्थे। कुकुरलाई छोरा जस्तै स्याहार गरे भक्तले। विस्तारै कुकुर प्रेमीहरुबीच भक्त आफ्नो नामले भन्दा ‘बुल सिंह’ नामले परिचित भए।

हुन त भक्तको घरमा अर्को कुकुर पनि थियो। तर १७ वर्ष पुगिसकेको कुकुर बिरामी पर्‍यो। भेटनरीमा गएर परीक्षण गराउँदा उसको जोर्नीहरुमा समस्या देखियो। त्यसपछि कुकुरलाई ‘कम्पनी’ दिन बुल सिंहलाई एडप्ट गरेका थिए भक्तले। हाल भक्तको घरमा ७ वटा कुकुर छन्। ३५ वर्षीय डंगोलले कोही एडप्ट गरेका त कोही उद्दार गरी ल्याइएका। फुर्सदमा कुकुरलाई बाहिर लग्नुका साथै घरमा नै ट्रेनिङसमेत गराउँछन् भक्तले।

५ वर्षभन्दा बढी भयो कुकुरहरुको उद्धारमा खटेको। त्यसअघि स्थानीय साथीसँग मिलेर कुकुरहरुलाई खाना खुवाउँथे उनी। त्यसक्रममा घाइते र घाउ भएका कुकुरहरु धेरै नै भेटे। त्यसपछि कुकुरको उद्धारमा सक्रिय भए। त्यसबेला स्रोत साधन केही थिएन। पछि विस्तारै ‘डग रस्क्यू’ को ट्रेनिङ लिए र अरुलाई पनि ट्रेनिङ लिन लगाए। अहिले भने छोरी इभा डंगोल पनि उन्लाई कुकुरको उद्धारमा साथ दिन थालेकी छिन्। फेसबुकमा ‘पोजिटिभ लभर्स ग्रुप’ समूह बनाएर भक्त हाल ‘डग रेस्क्यू र एडप्टेसन’ मा सक्रिय छन्।