कोरोना भाइरस (कोभिड–१९) का गम्भीर बिरामीको संख्या दिनहुँ बढ्दै गर्दा तिनीहरूको अस्पताल बसाइ कम गर्न सहयोगी मानिएको तथा पछिल्ला दिनमा त्यस्ता बिरामीको उपचारमा लोकप्रिय बन्दै गएको औषधि ‘रेम्डेसिभिर’ को अभाव देखिएको छ। परीक्षणका क्रममा रहेको यो औषधिको माग नेपालमा बढ्दो छ। तर यसको आपूर्तिको स्थिति अत्यन्त कमजोर बनेको छ। यो औषधि समयमै आयात गर्न सम्म्बन्धित सरकारी निकाय तथा निजी आयातकर्ता असफल देखिएका छन्।
औषधि विभागले पहिलो चरणमा डेढ महिनाअघि निजी आयातकर्तालाई यो औषधि ६ हजार भायल आयात गर्न अनुमित दिएको थियो। यसको अभाव बढेसँगै गत शनिबार थप ६ हजार भायल आयात गर्न अनुमति दिएको छ। तर त्यो औषधि नेपाल आइपुग्न केही साता लाग्ने देखिएको छ। निजी कम्पनीले यसअघि आयात गरेको ६ हजार भायलबाहेक नेपाल स्वास्थ्यय अनुसन्धान परिषद्ले अनुदानमा प्राप्त गरेको ७ हजार भायल तोकिएका अस्पतालहरूमा वितरण भइसकेको छ। यसरी कुल १३ हजार भाइल औषधि नेपालमा औपचारिक रूपमा आएको देखिन्छ। एकजनालाई न्यूनतम ६ भायलको हिसाबले पनि २ हजारभन्दा बढी बिरामीले यो औषधि प्रयोग गर्न सक्ने देखिन्छ। सामान्यतः एक बिरामीलाई अवस्था हेरेर ६ देखि ११ डोज भायल औषधि दिनुपर्ने हुन्छ। कम्पनीअनुसार मूल्य फरक भए पनि नेपालमा एक भायल औषधिको मूल्य ६ हजारदेखि ८ हजार रुपैयाँ पर्छ। नसामा इन्जेक्सनमार्फत दिइने सय मिलीग्रामको औषधिलाई एक भायल भनिन्छ।
कोसी अस्पताल कोभिड–१९ सेन्टरका संयोजक डा. दीपक सिग्देल सरकारद्वारा सो अस्पताललाई प्राप्त सय भायल रेम्डेसिभिर खपत भइसकेको र अस्पतालमा १० बिरामीलाई यो औषधि चलाउनुपर्ने स्थिति रहेको बताउँछन्। सो अस्पतालमा कुल १६ जनामा यो औषधिको प्रयोग भएकोमा १३ बिरामीलाई राम्रो गरेको र तीनजनाको भने मृत्यु भएको उनले जानकारी दिए। ‘आवश्यकता र मागअनुसार यो औषधि उपलब्ध छैन,’ उनी भन्छन्। यसैगरी चितवन मेडिकल कलेजका छातीरोग तथा क्रिटिकल केयर विशेषज्ञ डा. शीतल अधिकारी सो अस्पतालमा १६ वटै सघन उपचार कक्षका शड्ढयामा रहेका बिरामीलाई यो औषधि आवश्यक रहे पनि उपलब्ध नभएको गुनासो गर्छन्।
